Getxoko Gobernu Batzordeak oniritzia eman berri dio Algortako Biotz Alai plazako ingurua estaltzeari. Egun, zutabedun eta estalperik gabeko pergola batek inguratzen du eremua. Gaur goizean Imanol Landa alkateak aurkeztutako proiektuan jasotzen denez, plazako ingurua estaliko dute, horretarako markesina jarriz. “Hartara, inguruko auzotarrek esparru publiko hau erabili ahal izango dute batzarretarako edo elkartzeko leku legez, bai udaldian, gerizpea emango duelako, bai neguan, euriarentzat aterpea izango delako”, esan du udal agintariak (mp3). Bestalde, hormei atxikitako eserlekuak, jardinerak eta erdian dagoen harrizko eskultura kendu egingo dituzte. Plazako zoladura oso egoera onean dago eta horregatik bere horretan utziko dute. Pergola berriak, 4 metroko sakonera izango du. Plazak neurtzen dituen 2.118 metro koadrotatik 565 beteko ditu. Horretaz gain, kontsumo txikiko argiak izango ditu eta 156 metro luzeko eserleku berria ipiniko dute. Lanak datorren irailaren amaieran hasiko dira eta hauek amaitzeko epea 4 hilabetekoa izango da. Aurrekontua 442.000 eurokoa da. Alkateak aurreratu duenez, plaza itxi egingo dute gauez, "auzotarrak ez gogaitzeko". Argazkian, Biotz Alai plazan bertan, aterki azpian amaitu dute prentsaurrekoa Imanol Landa alkateak eta Joseba Arregi Hirigintza zinegotziak. Argazki gehiago ikusteko sakatu hemen.
Landak azaldu duenez (mp3), plazaren erdigunea garbi geratuko da eta umeentzako jolasak ipiniko dituzte. Horrez gain, esparru bat libre utziko dute, inguruko tabernek terraza ipin dezaten. "Modu horretan, bi eratako guneak izango ditugu batera bertan: bat atsegina, jendeak zerbait lasai hartzeko modukoa, eta bestea, garbia, umeek jolasteko”, aipatu du alkateak. Bestalde, hainbat ekitaldi egiterako orduan, ondoan dagoen San Nikolas plaza ordezkatuko du Biotz Alaik; Getxo Antzoki berria eraikitzeko lanak direla eta ezin izango baita erabili urte batzuetan. Berrikuntzak ez dira traba izango, egun, bertan egiten diren jarduerak egiten jarraitu ahal izateko; hala nola, San Lorentzo eta Erdi Aroko azokak eta Jazzaldia. Plaza horrek bi sarrera-irteera ditu: bata Andres Kortina kaletik eta bestea Algortako Etorbidetik. Herri esparrua da, soilik oinezkoek erabiltzekoa, eta etxe artean dago. Bere azpian etxebizitza horietako bizilagunentzako aparkalekua dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun