Motor, ziklomotor eta bizikleta istripuen eta harrapatzeen kopurua murriztea da 2009. urterako Herrizaingo Saila buru duen Bide Segurtasun Batzordeak ezarritako lehentasunetako bat. Urte osoan zehar zaintza handia egiten duten arren, datorren hamabostaldian agenteek kontrolak areagotuko dituzte, segurtasunari dagokionean egiten diren arau-urraketak antzeman eta zuzentzeko; hala, kaskoaren erabilera, dokumentazioa (baimenak, IAT azterketak, aseguruak) behar bezala eramatea edota mota honetako ibilgailuek sortzen dituzten zaratak kontrolatuko dituzte.
Helburuak
Kanpainaren baitan, ziklomotor eta motorrek beharrezko baimenak, asegurua eta IAT azterketak (3. urtetik aurrera) egunean izatea kontrolatuko dute agenteek; dokumentazio hau ez eramateak salaketa bat jasotzea eta gidabaimena kentzea ekarriko luke.
Halaber, ihes-hodiak kontrolatuko dituzte zaratei buruzko araudian oinarrituta; hala, homologatu gabeko ihes-hodiekin, "ihes askeekin" edota ihes-hodi desegoki edo ez eraginkorrekin doazen ibilgailuak ibilgetuko dituzte.
Bestalde, harrapatzeen inguruan, seinaleztatutako tarteetan (zebra-bideetan eta semaforoa gorri dagoen tokietan) oinezkoei bidea ematen ez dieten gidariak, zein zebra-bidetik kanpo edo semaforo gorria piztuta dagoela bidea zeharkatzen duten oinezkoak salatuko dituzte poliziek.
Azkenik, txirrindulariei dagokienez, kanpainak zenbait puntu azpimarratuko ditu: zirkulazio arauak betetzea, bidegorrien erabilera, paraleloan zirkulatzea bezalako arauak bete behar izatea trafikoaren egoera kontuan hartu gabe (pilaketak... ), Udal Ordenantzak betetzea...
Azken honi dagokionez, martxoan egindako kanpainan Gasteizko Udaltzaingoak ondorioztatu zuen segurtasun baldintza guztiak betetzen zituzten bizikleten kopurua ez zela erdira ere heltzen, eta beharrezko segurtasun arropak ibilgailu hauetako gidarien heren batek solik erabiltzen zituela.
EAEko poliziak eta proiektuan parte hartzen duten Udaletako Udaltzaingoek martxoan egindako kanpainan 1.049 kontrol burutu eta 8.452 gidari kontrolatu zituzten. Horietatik 371 (19 bizikletan zihoazen eta 64 motor-gidariak ziren) salatu zituzten zirkulazio arauren bat haustegatik. Halaber, agenteek 591 txirrindulari eta oinezko ohartarazi zituzten, arauren bat urratzeagatik.
Motor, ziklomotor, harrapatze eta bizikleten kontrol kanpaina abiatuko dute bihar Getxo eta Leioako udaltzainek
2009ko eka. 7a, 22:30
Datozen hamabost egunotan, ekainaren 8tik 21era, Ertzaintzak eta Udaltzaingoek motozikleta, ziklomotor, harrapatze eta bizikleten kontrol kanpaina berezia egingo dute. Hain zuzen ere, mota honetako ibilgailuen istripuak saihestea da 2009rako Euskadiko Bide Segurtasunerako Plan Estrategikoan ezarritako lehentasunetako bat, Eusko Jaurlaritzaren Herrizaingo Sailak zabaldu duenez. Araudia, kaskoaren erabilera, eta dokumentazio eta zaraten arauak betetzea zainduko dute batez ere agenteek. Halaber, abiaduraren inguruan eta ziklomotor eta motor-gidariek izan ditzaketen beste ohitura txar batzuei buruz kontzientziazio mezuak helaraziko ditu Herrizaingo Sailak. Ertzaintzaz gain, kanpaina honetan Donostia, Gasteiz, Bilbo, Basauri, Eibar, Getxo, Irun edota Leioako udaltzainek parte hartuko dute, izan ere, herri barruko errepideetan motor, ziklomotor eta bizikleta ugari dabiltza. Bitartean, EAEko errepideetan edari alkoholdunen eraginpean gidatzea egotzita atxilotutako 21 lagunetatik bat atzo atzeman zuten Sopelan; eta beste bi gaur bertan Getxo udalerrian. Argazkian, Getxoko udaltzain bat.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun