Asteburuan sei gidari atxilotu eta beste hamar salatu ditu Getxoko Udaltzaingoak

Getxoko Udaltzaingoak sei gidari atxilotu eta, epaiketa arinaren sistemaren bidez, epailearen esku utzi ditu, bide segurtasunaren kontrako hainbat delitu egotzita. Horretaz gain, beste hamar laguni salaketa administratiboa jarri die tokiko poliziak, baimendutako alkohol tasa gainditzea leporatuta. Horiei guztiei, ostiraletik igandera egin zieten alkoholemia kontrola, trafiko istripuekin zerikusia izan edo trafiko arauak hautsi zituztelakoan. Aipatu azken salaketa horietarako, 302 eta 602 euro arteko isunak aurreikusten ditu Zirkulazioko Arautegi Orokorrak; zirkulazio baimenaren 4 edo 6 puntu kentzea ere. "Delitua bada epaitegiek ipintzen dute isuna eta salaketa administratiboen kasuan, aipatu kopuru bien arteko isunak", azaldu dute polizia iturriek. Bestalde, zirkulazio baimenik gabe gidatzen ari zirelakoan, beste lau pertsonaren kontrako salaketa jarri du Getxoko Udaltzaingoak. Argazkian, Imanol Landa alkatea Getxoko Udaltzaingoaren koordinazio zentroan.