Azkenik, ekainaren 20rako, larunbatarekin, bazkaria egingo dute Algortan berbalagunek, Bizarra Lepoaneko lagunek, euskaltegietako lagunek eta lagun hauen guztien lagunek, kurtso amaiera ospatzeko. "Kurtsoaren amaiera edo udaren hasiera ospatuko dugun ez dugu oso argi, baina euskaldunok aitzakia handiren beharrik ez dugunez...", Lucesek aipatu duenez. Horretarako, Zabala eskolako aterpea nahikoa izango dute "euriak ez bustitzeko, ezta eguzkiak bertan txigortzeko ere". Beraz, bertan jarriko diote helmuga 13:00etan hasiko duten bertso-poteo-kalejira-musikatuari. Ordu eta erdiz, Algortako taberna ingurua alaituko dute alboka, trikitrixa, pandero eta bertso doinuz; eta 14:30ean bazkalduko dute Zabala eskoletan.
"Hala ere, ez pentsa modu honetako bazkalaurrea izan ondoren, jan eta edatera bakarrik murriztuko dugunik gure ekintza. Musikak ez gaitu, ahoa betea izanagatik, utziko. Gainera behin irentsi beharrekoak irentsita, eta ahoa berriro libre daukagunean, kantatzeari ekingo baitiogu. Bazkalostea giroak gidatuko du, hori bai, beti ere gure eztarrien baimenarekin", adierazi du Egizuko dinamizatzaileak. Bazkarirako txartela 15 eurotan izango da helduentzat eta 8 eurotan umeentzat.
Berbalagun talde berriak jarriko ditu udan Egizuk
2009ko eka. 9a, 12:41
Uztailean eta abuztuan zehar berbalagun talde berriak jarriko ditu abian Egizu! Getxo Euskaldun elkarteak. "Jende askok denbora gehiago du udan, lasaiago dabil, eta tartetxoa badu terraza batean lasai-lasai berbalagunekin elkartzeko. Parte hartzeko zeuk esan zein ordutan eta egunetan etorri ahal zaren eta horren arabera talde berriak sortuko ditugu", azaldu dute Rozio Luces taldeko dinamizatzaileak. Ekaina osoan egongo da izena emateko aukera. Bitartean, urteroko ohiturari eutsiz, larunbat eta igande honetarako, bizikleta asteburua antolatu du Egizuk. Eta oraindik ere lekua geratzen da apuntatzeko. Aurten Arabako Donejakue bidean barrena ibiliko dira. Barriako aterpean egingo dute lo eta irteerak bertatik egingo dituzte. Berbalagun eta bazkideek 40 euro ordaindu beharko dituzte; eta besteek 50 euro. Izena emateko 619 935 541 telefono zenbakira deitzea badago edo bestela egizugetxo[abildua]yahoo.com posta elektronikora idatzi. Argazkian, joan den larunbatean, Gasteizko Mintza Egunean izan ziren Egizuko lagunak / Egizu.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun