Espainian ere, dozenaka herritan zenbaketa berria egitea eskatuko dute internazionalistek, milaka boto "lapurtu" dizkietelakoan. Ezker Gaztelarra eta Komuneroen koalizio horrek komuneroen matxinada urtero ospatzen duen Villalar herrian boto bat bera ere ez jaso izana balizko irregulartasunen adibiderik onenetarikoa da. Bitartean, web[abildua]iniciativainternacionalista.org posta helbidera balizko irregulartasunak bidaltzea eskatu diete herritarrei.
Bestelako irregulartasunak
Baina, agerikoak diren "akats" gehienak II-HErekin lotuta badaude ere. badira bestelako kasuak. Horrela, Sustatu.com-ek zabaldu duenez, Maria Teresa Fernandez de la Vega Espainiako Gobernuko presidenteordeak ez omen zion botoa bere alderdiari eman, gutxienez, Espainiako Barne Ministerioaren datuen arabera. Izan ere, De la Vegak Valentziako Beneixida herrian eman zuen botoa baina bertan PSOEk ez omen zuen botorik jaso eta, ordea, POSI garaile atera zen, Amezketan bezala, 215 botoekin.
Beste adibide batzuk aipatzearren, Errioxako Santurde de Riojan ustez PSOEk eskuratutako 66 boto PACMAren izenean agertu dira; Daya Viejan (Alacant) PPren 101 boto Ezker Antikapitalistari eman omen dizkiete; Arcicollarren (Toledo) PACMAk 125 boto eskuratu ei ditu, PSOErenak liratekeenak; Kadizko La Linean PSOEren 853 boto Iniziatiba Feministari gehitu dizkiote. Dena den, balizko akats horien maiztasuna II-HErekin eman dena baino askoz txikiagoa da.
Orkatz Gallastegi eta Castello-ko beste presoek ezin izan zutela bozkatu salatu du II-HEk
Ustezko hauteskunde-iruzurra argitzeko egiten ari den datu bilketaren barruan, Castelloko espetxean dauden presoak, tartean Orkatz Gallastegi Sodupe berangoztarra, bozkatu gabe gelditu zirela salatu du Iniziatiba Internazionalistak. Sare sozialetan bidez zabaldu duten bezala, horren gaineko informazioa eskuratu berri du Alfonso Sastreren hautagaitzak. Identifikatu ez duten iturri baten arabera, Castello espetxeak ez omen zituen bidali Europako Legebiltzarrerako hauteskundeen posta bidezko botoak, "Zuzendaritzan oso lanpetuta ibili zirenez ahaztu egin zitzaielako". Era berean, ezker abertzaleak sostengatutako koalizioak ez du jakinarazi boto horiek azkenean zenbatzerik izango den ala ez. Bitartean, bihar, goizeko 10etan hasiko da inpugnatutako mahaien zenbaketa berria. Euskal Herrian, besteak beste, Sopela, Gueñes, Zalla, Abadiño, Mungia, Bermeo, Arrigorriaga, Baztan, Etxalar, Mañeru, Noain, Erronkari, Amezketa, Soraluze, Zumarraga, Billabona, Tolosa, Usurbil, Eibar, Elgoibar, Ordizia, Legazpi eta Oreretako hainbat mahaitan salatu ditu iruzurrak Iniziatiba Internazionalistak. 2.000 boto baino gehiago izan daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun