Bihar epaituko dute Iker Gallastegi
2009ko eka. 9a, 19:23
Asteazken honetan, ekainak 10, epaituko dute, Espainiako Auzitegi Nazionalean, Iker Gallastegi 83 urte militante abertzale historikoa eta Irantzu, Lexuri eta Orkatz preso berangoztarren osaba, Uribe Kostako Amnistiaren Aldeko Mugimenduak Etengabe bitakoran zabaldu duenez. Fernando Grande-Marlaska epaileak erabaki hori hartu zuen 2007ko apirilaren 30ean eta orain atera da epaiketarako data. Horren arabera, Tele5 telebistako erreportaje baterako, ezkutuko kameraren bidez hartu zizkioten hitzak direla eta, "terrorismoaren gorazarre" egitea leporatzen diote Gallastegiri. Fiskaltza, Ermuko Foroa eta España y Libertad elkartearen akusazioek urte bat eta sei hilabete eta bi urte bitarteko eskaerak egin dituzte. Epaiketa burutu bitartean, Grande-Marlaskak 3.000 euroko fidantza ere ezarri zion Gallastegiri. Argazkian, Iker Gallastegi / Etengabe.Iker Gallastegiren aurkako salaketa eta ikerketaren hasiera 2006ko uztailean izan ziren eta 2007ko otsailaren 22an hartu zioten deklarazioa. Gallastegik berak Juan Del Olmo epailearen aurrean esan zuenari jarraituz, Uribe Kostako AAMk "kontu hau guztia muntaia politiko mediatikoa besterik ez" dela salatu du. Errepresioaren aurkakoek azaldu dutenez, "egun batean, Telletxeko presoen aldeko karteladan zegoela, pertsona bi inguratu zitzaizkion italiar kazetariak zirela esanez, eta galdera batzuk egin zizkioten euskal gatazkaren inguruan, herritarren iritziak jaso nahi zituztela-eta". Besteren artean, honakoa adierazi zuen Gallastegik: “zergatik eskatu behar dugu barkamena? Guri nork eskatu digu barkamena frankismoaren 40 urteak direla eta? ETAn ez dago hiltzea gustatzen zaien horietakorik, ez dago. Haien egitekoa da, aberriaren betebeharra delako hiltzen dute”. "Handik sei hilabetetara esaldi horiek moztuta eta modu maltzurrean muntatuta agertu ziren Tele5 telebista kate espainolean Miguel Angel Blancori buruzko programa batean. España y Libertad elkarteak salaketa jarri zuen, eta handik dator oraingo epaiketa hau", gaineratu du AAMk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun