"Non da Jon?" lelopean, manifestazio batek zeharkatuko ditu Donostiako kaleak, larunbat honetan, ekainak 13. Hitzordua 17:30ean jarri dute, Boulevardean. Gauzak horrela, Uribe Kostan ere bertara joateko autobusa antolatu dute. Osteguna da izena emateko azken eguna. Hortik aurrera telefonoz lotuko dira betetzeko gelditu daitezkeen azken lekuak. ETAk "Gara" egunkarira igorritako agirian ziurtatu zuenez, 47 urteko iheslari politiko donostiarra desagertuta dago apirilaren 18tik, eta, horren atzean, "Frantziako eta Espainiako estoldak" daudela dio. Erakunde armatuak aitortu egin du Jon Anza ETAko kide dela eta Poliziak jakin bazekiela hori. ETAren bertsioaren arabera, apirilaren 18an desagertu zen Anza: egun horretan zuen hitzordua erakunde armatuko talde batekin Tolosako erdigunean (Okzitania). Ziur da ETA Tolosarako trena hartu zuela Anzak-haren senide eta lagunek adierazi zuten moduan-, baina zehaztutako hitzordura azaldu ez, eta ordutik Anzaren berririk ez dutela salatu du erakunde armatuak. "Egun berean eta biharamunean badaezpada ezarrita zeuden hitzorduetara ez zen agertu". Desagerpenaren atzean, "GALen garaietan bezala, Espainiako poliziak eta Frantziako kolaborazionismoa" daudela dio. Argazkian, ostiralean Jon Anzaren desagertzea salatu zuen Algortan LABek.
Anzaren senide eta abokatuarekin batera, duela hiru aste Baionan emandako prentsaurreko batean salatu zuen Amnistiaren Aldeko Mugimenduak desagerpena. Jakinarazi zutenez, apirilaren 18tik desagerturik dago Anza. 47 urteko preso ohiak eritasun larria dauka -minbizia du, eta nabarmen galdu du ikusmena-. Apirilaren 24an mediku kontsulta zuen, baina ez zen agertu. Hori ikusita, Maritxu Paulus-Basurku abokatuak, senideen eskariz, desagerpena ikertzeko eskaera egin zion Errepublikako prokuradoreari, Baionako auzitegian. Jon Anza Donostian jaio zen duela 47 urte. 21 urte eman ditu preso Espainiako kartzeletan. ETAren arabera, "torturapean eta espetxean ez erortzearren", Ahetzera (Lapurdi) joan zen bizitzera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun