Lonnie Brooks
Bere karrerari Chicagon bultzada emateko bere etxea utzi eta 40 urte geroago, Lonnie Brooks-en (1933, Louisiana) musikak oraindik funky erritmoen eta Bayou, Opelousas eta Lafayetteko urtegietako soinuen funtsa gordetzen du. Brooks-ek bere jatorrietako soinuak Texasko swing, Memphiseko soul eta Chicagoko blues garbienarekin konbinatzen ditu zapore propioko nahasketa sortzeko.
Lee Baker Jr. izenarekin jaioa, Brooks Port Arthur-eko gazte langilea zen, bere etxeko atarian gitarra jotzen ari zela Clifton Chenier mitikoak begirada harengan jarri zuenean. Red Hot Louisiana Band-eko kide izateko gonbit egin zion. Handik gutxira, "Guitar Junior" ezizenarekin, rockaren eszenan bat-batean sartu zen "Family Rules", "The Crawl" edo "Roll, Roll, Roll" bezalako hit-ekin.
1959an Sam Cooke talde ospetsuarekin bat egin zuen hegoaldetik zeharreko bira batean. Lankidetza horren emaitza gisa, estilo propioa garatzen hasi zen, Chicagoko erritmoak Muddy Waters, Howlin' Wolf, Little Walter, Otis Rush edo Magic Sam-en eraginekin batuz. Garai hartan Jimmy Reed-ekin ere aritu zen elkarlanean eta "Big Boss Man" klasikoa grabatu eta bere izena oraingoarengatik aldatzea erabaki zuen.
60. hamarkadan emanaldiak oparo eman zituen AEBetako mendebaldean eta "Broke and Hungry" bezalako lanak grabatu zituen Guitar Junior izengoitipean. 1978an azkenean entzuleen aintzatespena heldu zitzaion; baita kritika ere, "Two Headed Man" albumaren bitartez. Album hori Alligator zigilu entzutetsuko Living Chicago Blues Series bildumarako grabatu zuen.
Lan horrek vodoo blues estiloaren sorrera markatu zuen eta Brooks-en zigilu pertsonal bilakatu zen. 1979n bere arrakasta musikaletako beste bat kaleratu zuen: "Bayou Lightning", arrakastatsu berehala bihurtu zuena eta Grammy sarietarako izendatu izatera eta nazioarteko aintzatespena lortzera eraman zuena. Harrezkero, Louisianako artista jaialdi entzutetsuenetan aritu da eta hainbat estilotako artista ugarirekin kontzertuetan hartu du parte, "Blues Brothers 2000" filmean bere burua antzezteaz gain.
Bihar hasiko da Getxoko Blues Jaialdia eta etzi Koko Taylor omenduko dute
2009ko eka. 11a, 14:01
Bihar, ostirala, Getxoko Nazioarteko Blues Jaialdiaren XXI. ekitaldia abiatuko dute. Lehenengo egunean, saio bikoitza egongo da Itzubaltzeta / Romoko Santa Eugenia plazan, 21:30etik aurrera. Eguneko protagonista Lonnie Brooks gitarra-jolea izango da, bluesaren eszenatokiko beteranoa dena eta eszenatokien gainean berrogei urte baino gehiagoko ibilbidea duena. Horren aurretik Belceblues talde gipuzkoarra jardungo da, "Infer" bere lehenengo diskoaren kantak eskaintzeko. Ohi bezala, saio guztiak doakoak izango dira. Bestalde, etzi, larunbata, Getxo&Blues jaialdiak Koko Taylor "Bluesaren erreginari" egingo dio omenaldia. Artista handiak aurten parte hartu behar zuen jaialdian, baina pasa den asteazkenean zendu zen. Horrela, bada, agertokian estilo anitzeko artistak bilduko dira: E. C. Scott abeslaria, Henry Butler eskarmentu handiko piano-jole eta abeslaria, bluesa, rhythm&bluesa eta jazza lantzen dituena eta Kenny Neal gitarra-jolea. Halaber, horiekin The Koko Taylor's Band ariko da, abeslaria handiaren taldea. Argazkian, Belceblues talde gipuzkoarra.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun