Hondeamakinak atzo eraitsi zuen, otsailaren hasierara arte Getxoko Turismo Bulegoaren egoitza nagusia zen "Azul marino" izeneko etxea, Algortako Ereaga hondartzan. Udal arduradunen arabera, "txosten teknikoek egiaztatu dute eraikinaren egituraren egoera oso txarra zela. Etxeko zutabe batzuk ez zeuden zoru gainean jarrita eta horregatik eraikina eusteko eskorak zeuden". Getxoko PPk, ordea, etxea botata "auzotarrei eta alderdi politikoei bizkarra ematea" egotzi die Imanol Landa alkateari eta EAJren Gobernu Taldeari. "La Terraza jatetxea bota eta bertan bunkerra egitearen kontra sinadurak batu dituzten bizilagunei eta osoko bilkuran hori atzera botatzea erabaki genuen alderdioi, alegia", Eduardo Andrade zinegotzi popularraren arabera. PPren ustez, Ereagan erabilera anitzeko eraikina altxatzeko "lehenengo urratsa" da atzokoa. Andraderen hitzetan, "baliteke hondartza denboraldia igarota hastea" aipatu egitasmoarekin. Halere, Ereagako turismo etxola eraisteak "ez dauka zerikusirik" La Terrazarako Udalak duen proposamenarekin, Landa alkatearen arabera. Argazkian, hondeamakina "Azul marino" izeneko etxea txikitzen / Getxoko PP. Argazki gehiago ikusteko sakatu hemen.
Getxoko PPk salatutakoaren arabera, "berriro ere harrokeria erakutsi dute" Landak eta EAJk, "euren kabuz eta inori kontsultatu gabe hartu dutelako erabakia". Hala ere, arrazoi nahikoak ei zituen Udalak hori botatzeko: "batzuetan teilatu gainean gazte batzuk egon izanagatik eta udaldian inguru horretan izaten den jende kopuru handiagatik, arrisku egoera posibleak ekiditeko eraisteari ekin diogu. Bere egoera oso narriatuta zegoen eta ziklogenesia jasan ondoren, askoz hondatuago geratu zen eta horrek bere behin betiko itxiera eragin zuen. Udal txosten teknikoek argitu zuten etxe katalogatua edo babestua ez zenez, lurrera bota behar zela, kalte handiagorik ez gertatzeko", azaldu dute tokiko arduradunek. Eduardo Andrade zinegotzi popularrari, ordea, "aitzakia hutsak" iruditzen zaizkio horiek: "zurak leku askotan aurre hartu dio denborari. Nahikoa zen kaltetuta zeuden egurrak aldatzea eta bernizatzea", bere hitzetan. Turismo etxola botatzeak 16.000 euroko kostua izan du, Andraderen arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun