Getxon Iniziatiba Internazionalistari 33 boto kendu zizkiotela onartu du Hauteskunde Batzordeak
Espainiako Barne Ministerioak egokitutako 3.141 botoez gain, Getxo udalerrian Iniziatiba Internazionalistak beste 33 boto gehiago batu zituela erabaki zuen atzo Bizkaiko Hauteskunde Batzordeak. Izan ere, pasa den ekainaren 7an egindako Europako Legebiltzarrerako hauteskundeen Getxoko aktetan bi arazo nagusi topatu zituzten. Alde batetik, II-HEren 33 boto beste hautagaitza baten izenpean agertzen ziren Espainiako Barne Ministerioaren dokumentazioan, nahiz eta mahaiko aktan ondo agertu. Beste aldetik, mahai oso bat bikoiztuta ageri zen. Bestalde, Sopelan Iniziatiba Internazionalistak ez du boto gehiagorik izango PACMAk lortutako boz kopuru handiaren kaltean eta ez du horretan ahaleginik xahutuko, bertan II-HEri dagozkion 791 botoak ondo jasota baitaude. Horretaz gain, Espainiatik kanpotik postaz bidalitako botoak ere zenbatu ziren atzo eta eragina izango dute eskualdean, nahiz eta normalean probintziaka ematen diren. Hego Euskal Herrian, guztira, beste hautagaitzetara bideratutako edo baliogabetzat emandako 1.468 boto berreskuratu ditu II-HEk, horietatik 384 Bizkaian. Gainera, beste 334 boz (102 Bizkaian) bereganatu ditu postaz, 140.068ko emaitza erdietsiz.
Dena den, Arnaldo Otegi ezker abertzaleko kide ezagunak Estatuan "hauteskunde-iruzurra" egin eta Sastreri jesarlekua lapurtu izana leporatu dio Espainiako Gobernuari. Kontrakoa frogatu nahi izatekotan, baliogabetzat jotako 97.000 botoak erakuts ditzaten erronka bota du. Izan ere, ezker abertzaleak sostengatutako II-EHren ordezkari askori boto baliogabeak ikustea ekidin diete hauteskunde batzorde gehienek, eta Bartzelonan ordezkaria zenbaketa egiten zen hoteletik Poliziak bidali zuen. Datu ofizialak, balizko helegiteak tartean, ez dute hilaren 27a baino lehenago zertan zabaldu behar. Bitartean, behin-behineko datuak eskaintzeko Espainiako Barne Ministerioak jarritako web orria desagertu da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun