Ehun lagun baino gehiagok erantzun diote, gaur arratsaldean, Inge Urrutia algortarraren atxiloketari. Guardia Zibilak borra luzagarriak eskuan, subfusilak kargatuz eta pistolei helduz moztu nahi izan dute auzokideek emakumeari agertu dioten elkartasuna, Algortako Salsidu kalean. Urrutia ihesaldi saiakera batekin lotzen dute. Berriak zabaldu duenez, Guardia Zibileko iturrien arabera, ETAk 2007rako Huelvako (Andaluzia) kartzelako euskal preso batzuen ihesa prestatu zuen eta, horrekin lotuta, gutxienez lau lagun atxilotu dituzte gaur. Iñaki Goioaga abokatua da atxilotuetako bat eta Inge Urrutia algortarra beste bat. Aurrena Bilbon atzeman dute. Hirugarren atxilotua Ana Paz litzateke, Gorka Garcia Sertutxa "Patas" preso algortarraren neska-laguna, eta Huelvako espetxean bertan atzeman dute. Bestalde, Juana Orta atzeman dute Andaluziako hiri berean. Orta bertoko elkartasun batzordeko kidea da. Guardia Zibila hiriko etxebizitza bat miatu du arratsaldean; baita Urrutiaren etxea ere, Algortan. Garcia Sertutxa, Arkaitz Goikoetxea Basabe "Torrotxero" -algortarrak biak- eta Igor Solana (Bilbo, 1974) presoak galdekatu ditu, halaber, Guardia Zibilak, eta haien ziegak miatu dituzte. Goikoetxea lehen Huelvan eduki zuten eta maiatzetik Valdemoron (Madril, Espainia) dago. Solana ere lehen Huelvako espetxean egon zen preso, eta joan den otsailetik Valentzian (Herrialde Katalanak) daukate. Arratsaldeko zortzietarako manifestazioa deitu du Uribe Kostako Amnistiaren Aldeko Mugimenduak, Algortako Telletxe plazatik abiatuta. Argazki gehiago ikusteko sakatu hemen.
Iazko maiatzean Bordelen (Frantzia) Francisco Javier Lopez Peña Thierry ETAko ustezko buruzagia atxilotu eta gero hasi zen Guardia Zibila balizko ihesa ikertzen, hark ustez horri buruzko paperak zituela-eta. Fernando Grande Marlaska Espainiako Auzitegi Nazionaleko epailea ari da operazioa zuzentzen. Guardia Zibilak dioenez, Goikoetxeak prestatu zuen plana, 2007an, Bizkaia komandoko kidea zela, eta asmoa Huelvako kartzelako presoak bahitutako helikopteroz Portugalera eramatea zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun