Inge Urrutia inkomunikatuta egon bitartean egunero mobilizazioak egingo dituzte

"Atxilotuak askatu. Errepresioa ez da bidea!" lelopean, elkarretaratzea egin dute gaur eguerdian Algortako Telletxe plazan 80 auzokidek. Era horretan salatu egin dute Guardia Zibilak atzo Inge Urrutia atxilotu izana eta 20 urteko gazte algortarra inkomunikazio egoeran mantentzea. Izan ere, "inkomunikazioan dagoen bitartean torturatua izateko arriskuaren pean dago eta hori ez da hipotesia, errealitatea baizik" adierazi du Algortako AAMk. Hori dela eta, inkomunikazioa altxatu arte, egunero mobilizatzera deitu du errepresioaren aurkako erakundeak. Bihar esate baterako, 20:00etan jarri dute hitzordua, Algortako Telletxe plazan bertan. Bestalde, Fernando Grande Marlaska epaileak zuzendutako operazioari buruz informazio berririk ez dagoela esan dute gaur. Azken datuak, beraz, guardia zibilek Urrutiari atzo bere etxean esandakoak dira, "aurreko atxiloketan baino hobeto tratatuko dutela", alegia, eta higiene pertsonaleko gauzak nezeser batean eramaten utzi ziotela. Era berean, Inge Madrilera lekuz aldatu zutela jakinarazi zieten atzo senideei. 2008ko uztailean atxilotu zuten aurretik Inge Urrutia. Orduan, beste sei atxilotuk bezala, torturatu zutela salatu zuen Ingek Garzonen aurrean. Argazkian, atzo atxiloketa burutu eta ordu batzuetara egindako manifestazioa.