Gaur, igandea, arratsaldeko bost eta erdiak aldera, BMW auto bat errepidetik irten da BI-637 errepidean, Algortako irteera adarraren parean, Plentziarako noranzkoan. Zerk eragin duen ez dakitela, gidariak autoaren kontrola galdu eta, errepidetik irten ostean, hesiaren kontra jo du, Eusko Jaurlaritzaren Herrizaingo Sailak zabaldu duenez. Talkaren ondorioz, kopilotua (emakume bat) auto barruan harrapatuta geratu da eta suhiltzaileek erreskatatu behar izan dute. Jarraian, anbulantzia batek Gurutzetako ospitalera eraman du, bertan artatzeko. Istripuaren ondorioz, errepideko eskuineko erreia itxita egon da, autoa errepidetik kentzen zuten bitartean; halere, ez da garrantzizko pilaketarik sortu. Bestalde, 18 lagun atxilotu ditu asteburuan EAEko errepideetan edari alkoholdunen eraginpean gidatzen ari zirelakoan. Horien artean, hiru pertsona atzeman dituzte atzo eta gaur Leioan. Argazkian, Ertzaintzaren errepide kontrola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun