Biharamunean, larunbatean, ekainak 13 Mike Hammer & The Taxi Drivers-en eskutik abiatuko zen bluesa. Laukote bizkaitarra 2004. urtean sortu zen eta zenbait estilo jotzeko gai da: soulean hasita, rockeraino, funkya ahaztu gabe. Taldeak hainbat saiotan erakutsi du bere kalitatea eta Gary Mooren handiaren telonero ari zen.
Horien ostean jaialdiaren saio nagusia abiatu zen: Koko Taylorri omenaldia, hain zuzen ere. Abeslari famatua orain dela bi aste zendu zen eta larunbaterako programatuta zegoen bere kontzertua Getxon. Omenaldian honako artista hauez osatutako hirukotea jardun zen: E. C. Scott abeslaria; Henry Butler eskarmentu handiko piano-jole eta abeslaria, bluesa, rhythm&bluesa eta jazza lantzen dituena, eta Kenny Neal gitarra-jolea. Halaber, horiekin The Koko Taylor's Band aritu zen, Koko Taylorrekin hainbat urtetan jardun den taldea, hain zuzen ere. 5.000 lagun inguruk gozatu zuten saioaz.
Jaialdiko azken kontzertua Johnny Mars harmonika joleak eskaini zuen. XXI. mendean, esperimentatuz eta erregistro berriak bilatuz, harmonika sendotzen jarraitzen duen musikari aparta da. Haren estiloa Blues harmonika jole gehienak erabiltzen duten ohikoa ez bezalakoa da. Bere kontzertuan 2.000 bat pertsona bildu ziren.
Hamar mila bat lagunek gozatu dute pasa den asteburuan Itzubaltzeta / Romon burutu den Getxoko Blues Jaialdiaren XXI. edizioaz. Ohi bezala, hainbat estilotako musikariak eta taldeak bildu ziren Santa Eugenia plazan. Bertan, Lonnie Brooks, Henry Butler, Kenny Neal, E. C. Scott, The Koko Taylor's Band, Johnny Mars, Belceblues eta Mike Hammer & The Taxi Drivers artistak eta taldeak aritu dira hiru egunez. Lehenengo jardunaldian, Belceblues aritu zen giroa berotzen. Talde gipuzkoarrak Steve Ray Vaughan edo Jeff Healey bezalako artisten eragina duen bluesa jo zuen eta "Infer" bere lehenengo diskoaren kantak aurkeztu zituen Getxon. Ondoren, Lonnie Brooks gitarra joleari iritsi zitzaion txanda. Brooks bluesaren eszenatokiko beteranoa da eta eszenatokien gainean berrogei urte baino gehiagoko ibilbide bete du. Voodoo Blues estiloaren adierazgarri da, estilo horretan Chicagoko, Mississippiko eta rhythm&blues bluesaren osagaiak elkartzen direlarik. Lehenengo bi saio horietan 3.000 lagun bildu ziren Santa Eugenia plazan. Argazkian, erdian, Lonnie Brooks Itzubaltzetan emandako kontzertuan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun