Atzo, igandea, egin zuten Uribe Kosta eskualdeko itsaslabar eta hondartzetan barrena Forum Sport Kosta Trail lasterketaren laugarren edizioa. Gizonezkoen artean, Arkaitz Zamakona Urigoitia izan zen irabazlea, bi ordu, 15 minutu eta 14 segundoko denbora eginez. Bere atzetik, Javier Olabarria Etxebarri (bi ordu, 16 minutu 39 segundo) eta Jesus Mari Perurena Olabarria (bi ordu, 18 minutu 42 segundo) sailkatu ziren, bigarren eta hirugarren, hurrenez hurren. Emakumezkoen kategorian, berriz, Agurtzane Argiarro Garcia izan zen azkarrena, ibilbidea 3 ordu, 3 minutu eta 59 segundotan eginez. Ainhoa Sanchez Diaz bigarren sailkatu zen (3 ordu eta 9 minutu) eta Marie-Pierre Dallaire hirugarren helmugaratu zen (3 ordu 14 minutu eta 20 segundo). Argazkian, korrikalariak labarretik hondartzara jaisten / © Barrika.net.
Forum Sport Kosta Trail lasterketaren laugarren edizioak partaidetza arrakastatsua izan zuen, aurreko edizioetako korrikalari kopurua gaindituz: 1.600 pertsona inguru bildu ziren igandean bertan esku hartzeko. Mendi lasterketan 350 korrikalari bildu ziren. Lasterketa horretan 30 kilometro egin ziren Portugaleten hasi eta Plentziako hondartza bitartean, Getxo, Sopela eta Barrikatik igaroz. Bestalde, adin guztietako mila pertsona baino gehiagok parte hartu zuten familiarteko Ibilaldian eta mendi Ibilaldian. Lehenak 12 kilometro zituen eta bigarrenak 20. Sopelako udaletxeko plazatik goizeko 9etan denak batera irten ondoren, familiarteko Ibilaldiko adin guztietako partaide ugariek Plentziako hondartzan amaitu zuten euren ibilbidea, zailtasun txikiko ibilaldia eginez eta anoa-postu batetik igaro ondoren. Bestalde, ibilbidearen zati handi batean korrikalariekin batera egon ziren mendi ibilaldiko partaideek Ermuamendiko igoerari (292 metro) aurre egin behar izan zioten, Gorlizko Itsasargiko anoa-postuan indarberritu ondoren. Izen-emateekin bildutako diru guztia Aspanovas Fundazioari, hau da, minbizia duten haurrak dituzten Bizkaiko gurasoen elkarteari emango diote.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun