"Egia nahi dugu!" manifestua
Europako hauteskundeetan Espainiako Estatuan atzemandako irregulartasunak argitzeko sinadura bilketa herritarra.
Europako hauteskundeen zenbaketan irregulartasun asko atzeman dituzte. Hainbat motakoak, gainera:
* Hainbat hautagaitzari bereak ez ziren bozkak esleitu dizkiote. Amezketan (Gipuzkoa), esaterako, POSIk jaso ditu II-HEren 113 boto.
* Baliogabe edo nulu bezala zenbatu dituzte berez baliogabeak ez ziren botoak. Guadalajaran, esaterako, boto baliogabeen erdiak ez ziren baliogabeak.
* Boto zurien eta baliogabeen kopurua asko handitu da. Estatistikoki ezohikoak diren kopuruetara iritsi dira. Aurtengo Europako hauteskundeetan, 2004koetan izan zen parte-hartze antzekoa. Bozka zuriak, ordea, 125.000 gehiago izan dira, eta baliogabeak 50.000 gehiago. Kataluniakoa da adibide garbia: boto zuriak %534 gehiago izan dira eta nuluak %366.
Horrez gain, herritarrek hainbat traba topatu dituzte. Trabak jartzen ari zaizkie analisi publikorako behar luketen datuak eskuratzeko.
Bestalde, salbuespen gutxi batzuk egon arren, Espainiako Estatuko hedabideak gertaera horiek ezkutatzen ari dira. Horregatik, herritarren laguntza behar dugu egoera ezagutarazteko eta egia ezagutzeko. Besterik ez dugu eskatzen, egia nahi dugu!
Uribe Kosta eta Erandioko dozenaka auzokidek, Euskal Herriko beste sorta bat lagunek eta Estatu espainiarreko beste zortzi nazioetako ehunaka pertsonek izenpetu dute Egia nahi dugu! guneko manifestua. Guztira, orain arte, 1.911 lagunek eta 49 taldek eskatu dute dagoeneko Europako hauteskundeetan Espainiako Estatuan atzemandako irregulartasunak argi daitezen. Bestalde, Iniziatiba Internazionalista koalizioak jakinarazi duenez, Andaluziako Kadiz probintzia osoko zenbaketaren aurka egin eta hauteskundeak errepikatu daitezen eskatuko du. Izan ere, II-HEren aburuz, Kadizko Hauteskunde Batzordeak hainbat irregulartasun burutu zuen ekainaren 10ean egindako batzarrean. Besteak beste, II-HEren ordezkaria hertsatzea, batzarraren aktaren edukia asmatzea eta hauteskundeen zenbaketa mahaietako aktekin egin beharrean, Espainiako Barne Ministerioaren datu informatikoak erabiltzea leporatu dio Antonio Maira Iniziatiba Internazionalistako ordezkariak Kadizko Hauteskunde Batzordeko presidenteari. Gainera, PSOEko ordezkariak Ministerioaren datuak ez eztabaidatzeko eta zenbaketa oztopatzeko aginduak zeuzkala aitortu ei zion Mairari. Gaia Kaos en la Red-en jarraitu daiteke, espainolez. Argazkian, Rubalcabari buruz II-HEk kaleratutako kartel bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun