Gaur arratsaldean ere Algortako Telletxe plazatik abiatu dira manifestazioan 215 bat herritar, larunbatean Guardia Zibilak egindako atxiloketak salatzeko. Uribe Kostako Amnistiaren Aldeko Mugimenduak adierazi duenez (mp3), gaur eramango omen zuten Espainiako Auzitegi Nazionalera Inge Urrutia gazte algortarra. Hartara, Madrilera abiatu dira senide eta lagunak. Baina, azkenean, ez dute epaile aurrera eraman. Ana Paz santutxuarrak eta Iñaki Goioaga sestaoarrak ere inkomunikatuta jarraituko lukete. Kartzelan "atxilotu" zituzten Gorka Garcia Sertutxa "Patas" algortarra, Arkaitz Goikoetxea azkorritarra eta Igor Solano presoak non daude ere ez dakite, "abokatuak bila ibili diren arren". Hainbat hedabidek espetxean isolatuta dauzkatela zabaldu dute; beste batzuetan, berriz, Garcia Sertutxa Madrilera eraman dutela. Hala ere, "informazio" horiek ez ditu "sinesgarritzat" jo AAMk, "hedabideek filtratutako informazioa delako". Bitartean, mobilizazioekin jarraituko dute. Argazkian, gaurko manifestazioa Algortan.
Bestalde, inkomunikazio egoerak "tortura eta errepresioa" dakartzala salatu du AAMk: "denok dakigu, azken batean, informazioa atera, presionatu eta torturak egiteko dela", adierazi dutenez. Askotan aipatzen den torturak saihesteko protokoloa betetzen ari ez direla aipatu du errepresioaren aurkako mugimenduak, "familiarrei atxilotuak non dauden esan ez baitzaie; ezta konfiantzako medikua eraman ere". Sarekadaren nondik norakoei dagokienez, berriro ere, ihesaldiaren hipotesia "oso sinesgarria ez" dela esan du AAMk. Horren atzean "abokatuak, senideak eta, azken batean, presoen inguruan laguntza ematen duen jendea kriminalizatzea" dagoela salatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun