Garcia Sertutxaren neskari 60.000 euroko bermea ezarri diote
2009ko eka. 16a, 23:38
Hasieran hedabideek kartzelatzeko agindua zeukala zabaldu arren, Ana Paz Gorka Garcia Sertutxa "Patas" preso politiko algortarraren neskalagunari 60.000 euroko bermea ezarri dio Fernando Grande Marlaska epaileak, espetxea ekidin ahal izateko. Bitartean, Iñako Goioaga abokatu sestaoarra fidantza barik kartzelaratzeko agindu du magistratuak, "erakunde terroristari laguntzea" leporatuta. Garcia Sertutxa preso algortarra ere auzipetu du Grande Marlaskak, "kartzela zigorra hausteko saiakera" egotzita. Bitartean, Inge Urrutia gazte algortarra etxerako bidean dago jada, kargurik gabe aske utzi ostean. Igor Solana gatibu bilbotarra zein Arkaitz Goikoetxea Basabe preso getxoztarrari ere ez die kausa honengatik zigorrik jarri epaileak. Azkorriko mutilak Valdemoroko espetxetik (Madril, Espainia) deklaratu behar izan du bideokonferentziaz, orain egun batzuk tibia eta peronea apurtu dituelako, Uribe Kostako Amnistiaren Aldeko Mugimenduak jakinarazi duenez. Gaur 150 lagun inguruk egin du manifestazioa Algortan. Argazkian, atxiloketa egun berean egindako manifestazioa.Bitartean, ongi etorri jendetsurik ez duela nahi adierazi du Inge Urrutia gazte algortarrak, AAMk aipatu duenez. Hortaz, lagun eta senideen artean egingo diote harrera. Bestalde, "aurreko atxiloketan baino hobeto tratatuko dutela" jakinarazi die familiarrei neskak. 2008ko uztailean atxilotu zuten aurretik Inge Urrutia. Orain bi urte Huelvako espetxera egin zuen bidaiaz galdezka ibili zaizkiola gaineratu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun