Euren autoetan egindako miaketak salatu dituzte Berangoko hainbat gaztek
2009ko eka. 17a, 17:58
Berangoko lau gaztek kalean aparkatuta zeuzkaten autoen barrukoak gauez arakatu dizkietela salatu dute epailearen aurrean, Uribe Kostako Amnistiaren Aldeko Mugimenduak Etengabe bitakoraren bitartez zabaldu duenez. "Autoak hainbat lekutan aparkatuta zeuzkaten eta barruko gauzak lekuz aldatuta aurkitu zituzten, baina ez zitzaien ezer falta", errepresioaren kontrako erakundearen arabera. "Azken aldian horrelako kasu gehiagoren berri" izan duela gaineratu du Uribe Kostako AAMk, baita "horrelakoak beti ere ezker abertzalearen inguruko pertsonen autoetan" gertatu direla azpimarratu ere. Hori dela eta, "gerra zikina eta gazteen aurkako jazarpenaren koordenadetan" kokatu dituzte legez kanpo buruturiko ekintza horiek. Argazkian, Guardia Zibila larunbatean Algortan."Batzuetan inposatutako legearen arabera, besteetan legez kanpo aritzen dira: hor ikusten da Estatuaren errepresioaren benetako aurpegia. Holako erasoei aurre egiteko ezinbestekoa da inguruko lagunen babesa eta elkartasuna bilatu eta sentitzea. Gogoan hartu: Jon Anza, Lander Fernandez, bahiketak, informazioa emateko mehatxuak, erasoak…", azaldu du Uribe Kostako Amnistiaren Aldeko Mugimenduak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun