Erandioko EAJk Joseba Goikouria Zarraga aurkeztuko du, ostegun honetan, ekainak 18, 11:00etan izango den udal osoko bilkuran, alkatetza hartzeko. Gainera, ez da sorpresarik espero biharko, jelkideek 21 eserlekuetatik 11 baitituzte, 2007ko udal hauteskundeetan Eusko Abertzale Ekintza legez kanpo utzi ostean. Egun, Ogasuna eta Funtzio Publiko Sailetako arduradun eta lehenengo alkateordeak azken 14 urteotan Erandioko alkatea izan den Mikel Arieta-Araunabeñaren lekukoa hartuko du. Bihar arte udal agintaria izango denak Bilboko Merkataritza, Industria eta Nabigazioko Ganbara Ofizialeko Zuzendaritzara lekuz aldatzeko asmoa du. EAJren arabera, "errelebo honi esker, hasita dauden proiektuak aurrera eroango dira, eta gainera, bermatuta dago gauza berriak egiteko beharrezkoa den esperientzia. EAJrentzat Erandio garrantzitsua da, baita bertan bizi diren herritar guztiak ere. Horregatik gaude Joseba Goikouriaren alde, eta lankide izango gaitu agintaldi honetarako aurkeztu genuen programa burutzeko lanetan". Argazkian, Goikouria eta Arieta-Araunabeña.
Joseba Goikouriak 46 urte ditu, ezkonduta dago eta bi seme-alaba ditu. Kimikaria da eta EHUn lizentziatu zen, ondoren Eroski kooperatiban lan egiteko. 90 hamarkadatik 2003ra arte Kalitate Arloan lan egin zuen. Bazkide kooperatibista jarraitzen du izaten, udal ardurak hartzeko eszedentzia hartu bazuen ere. 1997an hartu zituen bere lehenengo ardurak Erandioko Udal Gobernuan, Udaltzaingoaz kargutu zenean. Bi urte beranduago, Gizarte Ekintzarako zinegotzi bihurtu zen eta horretan jardun zuen 2003ra arte, Eroskiko bere lanean jarraitzen zuen bitartean. 2003tik aurrera, lana alboratu eta egun eramaten dituen Pertsonal, Ogasuna eta Udal Egoitza sailak hartu zituen dedikazio osoz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun