Ertzaintzak 31 eta 32 urteko gizonezko bi atxilotu zituen atzo goizean Erandion, apirilean aipatu udalerriko enpresa batean indarra erabiliz lapurtu zutelakoan. Eusko Jaurlaritzaren Herrizaingo Sailak zabaldutakoaren arabera, bi gizonek hogei mila euroko balioa duten mota ezberdinetako sei tona berniz eta bertako langileek erabili ohi dituzten hainbat objektu eta material ostu omen zituzten. Horien artean, lizpaperrak, diskoak, bandak, maskarak, arrabolak eta masillak ere hartu ei zituzten, guztira bost mila euroko baliokoak. Ertzaintzak, salaketa baten bidez izan zuen lapurretaren berri. Ustezko gaizkileek sarrerako atean kalteak eragin zituzten, polizia iturriek diotenez. Salaketaren arabera, lapurtutako bernizak ezaugarri bereziak zituen, enpresan bertan egiten zuten eta ondorioz, lapurtutakoa merkaturatzea deigarria izango litzateke. Salatzaileak emandako datuei eta Ertzaintzak abiatutako ikerketari esker, ustezko bi lapurrak identifikatu eta aurkitu dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun