Bi gizon atxilotu dituzte Berangon ostutako materiala enpresa berari saltzen saiatzea egotzita
2009ko eka. 17a, 19:21
Ertzaintzak 29 eta 67 urteko bi lagun atxilotu zituen atzo Berangon, lapurtutako produktuen ezkutaketa delitua leporatuta. Bi gizonezkoek kobrezko piezak eta 18 tona txirbil saldu nahi izan zizkioten enpresa berangoztar bati, material hori joan den ostegunean (hilak 11) Gasteizen aparkatuta zegoen enpresa beraren kamioi batetik lapurtua izan zela, Eusko Jaurlaritzaren Herrizaingo Sailak zabaldutakoaren arabera. Berreskuratu duten material horren merkatuko balioak 48 mila euroak gainditzen ditu. Enpresara iritsi zirenean, agenteek arduradunarekin hitz egin zuten eta honek adierazi zien gizonezko bat goizez jarri omen zela beraiekin harremanetan eta arratsaldean biltzea adostu zutela salmenta egiteko. Ustezko saltzaileek kamioian zekartena ikustean, joan den ostegunean bertan beraiei ostu zieten materiala zela jabetu omen zen enpresaria; Gasteizen aparkatuta zegoen eta kobrezko piezaz eta txirbilaz beteta zihoan enpresako kamioi bateko erremolkearen lapurreta jasan zuten salatzaileek joan den ostegunean. Berehala identifikatu zituzten agenteek bi susmagarriak: lapurtutako materialaz betetako kamioia enpresaraino eraman zuen gidaria eta material honen salmenta egiteko enpresarekin harremanetan jarri zen pertsona. Bi susmagarrien arabera, kamioan zeramaten karga (18 tonatik gorako guztizko pisua zuten kobrezko piezak eta txirbila) aurrez ezagutzen ez zuten hirugarren pertsona bati erosi ziotela adierazi zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun