Bitartean, Arrueren abokatuek sententziaren aurkako errekurtsoa aurkeztuko dute Auzitegi Gorenean, Goikoetxeari jarritako zigorra "nahikoa ez" dela uste dutelako, "El Correo Español"-ek zabaldutakoaren arabera. Euren iritziz, "sei urteko espetxe zigorra behar zuen" Azkorrikoak ""atentatu delitua" egotzita. Hala ere, Getxoko PPren bozeramailea "pozik" agertu da "gutxienez eskarmentu bezala balioko zaiolako". "Ez berari bakarrik, bere inguruko pertsonei ere; mehatxatzen, iraintzen eta ia erasotzen ezin direla joan ikus dezaten, zigortuak izan barik", gaineratu duenez. Amnistiaren Aldeko Mugimenduak, ordea, gogor salatu du "PPko zinegotzi baten hitza nahikoa izan dela Zigor Goikoetxea bi urteko espetxera zigortzeko". Azaldu dutenez, "aurrekari benetan arriskua dela deritzogu, honek espainiar alderdi politikoetako kideei izugarrizko ahalmena ematen baitie. Beraien hitza nahikoa izan daiteke aurrerantzean edozein herritar inolako frogarik gabe espetxeratu eta zigortzeko".
Amnistiaren Aldeko Mugimenduaren salaketa:
Ezer baino lehen gogor salatu nahi dugu PPko zinegotzi baten hitza nahikoa izan dela Zigor Goikoetxea bi urteko espetxera zigortzeko. Aurrekari benetan arriskua dela deritzogu, honek espainiar alderdi politikoetako kideei izugarrizko ahalmena ematen baitie. Beraien hitza nahikoa izan daiteke aurrerantzean edozein herritar inolako frogarik gabe espetxeratu eta zigortzeko.
Eskandalu izugarria deritzogu bestalde Zigorri bere herrian bizitzeko debekua ezartzea. Euskal preso politiko ohien aurka ezarri nahi dituzten neurriak jarri zaizkio Zigorri, bere ingurune hurbiletik atera eta kontrolera neurri lotsagarriak ezarriak.
Zigorren baldintzarik gabeko askatasuna eskatzen dugu, eta Zigorrek bere herrian eskubide guztien jabe bizitzeko eskubide duela esan nahi dugu.
Zigor Goikoetxeari bi urteko espetxe zigorra ezarri diote
2009ko eka. 18a, 19:38
Zigor Goikoetxea Azkorriko preso politikoa apirilaren 14an epaitu zuten Marisa Arrue Getxoko PPren zinegotziak bere aurka egindako salaketaren ondorioz. Bertan, abuztuaren 10eko San Lorentzo azokan, Zigor Goikoetxeak heriotza mehatxuak egin zizkiola zioen popularrak. Hasieran hamar urte eta gero sei urteko espetxe zigorra eskatu zuten Fiskaltzak, PPk eta Arruek. Bada, Amnistiaren Aldeko Mugimenduak jakinarazi duenez, atzo atera zen bere aurkako epaiketaren ebazpena eta epaileak honako zigorra jarri dio Goikoetxeari: bi urteko espetxe zigorra, Getxo udalerrian bizitzeko debekua, Marisa Arruerengandik 300 metro baino gertuago egoteko debekua eta horri 6.000 euro ordaintzeko zigorra. Alfontso Zenon abokatuak gaur Azkorriko gaztearen askatasun eskaera egingo du, epaia bi urte baino gehiagokoa ez denez zigorra kalean betetzeko eskatuz. Hain zuzen ere, egun preso daukate Goikoetxea, Espainiako Auzitegi Nazionalean afera honengatik deklaratzera deitua izan zenetik, eta epaiketa ondoren ere espetxeratua jarraitu zuen. Denbora horretan, mutila askatzearen aldeko aldarria sare sozialetan zabaldu egin da. Argazkian, urtarrilaren 20an Zigor Goikoetxearen askatasuna aldarrikatzeko Algortan egindako kontzentrazioa.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun