Jose Manuel Etxebarria Gangoiti aukeratu du presidente Getxo Artea Rugby Taldeak, Agustin "Tintxu" Martinezen lekukoa hartzeko. Etxebarriak jokalari eta zuzendaritzako kide ohiek sustatutako zerrenda zuzendu du, taldeko hauteskundeetara aurkeztu den zerrenda bakarra, alegia. Etxebarria EAJren kide ezaguna da. Izan ere, alderdi horrekin Ogasun zinegotzia eta alkateordea izan da Getxoko Udalean. Lanbidez ekonomialaria da eta Getxo Arteak zabaldu duenez, "rugby munduarekin familia-lotura luzea" dauka. Etxebarriak gidatuko duen lehenengo ekimena bihar bertan ospatuko du taldeak Faduran. Izan ere, Seven Tokata lehiaketaren bidez, Getxo Rugby taldeak kirolaren gozamena partekatu nahi du bere zale eta getxoztar guztiekin. Horretarako, nahi duenak hurbiltzeko aukera izango du bihar, larunbata, 16:00etan. Sarrera doakoa izango da eta hirugarren aldia garagardotegian ospatuko dute 19:30etik aurrera. Argazkian, ezkerrean Jose Manuel Etxebarria Gangoiti, 2005ean Iñaki Zarraoa alkatearekin emandako prentsaurreko batean.
Bestalde, pasa den larunbatean, hilak 20, Durangoko Rugby Taldeak irabazi zuen Ereagako Seven Sariaren bigarren edizioa. Durangaldekoak, beraz, garaiezinak bihurtu dira txapelketa honetan, burutu den bi urteetan nagusitu ostean. Bigarrenak Majadahondako taldekoak izan ziren, haien atzetik Iruñea eta Kakarraldo sailkatu zirela. Aipatutakoez gain, besteak beste, honako taldeak ere lehiatu ziren: Eibar, Valladolideko Fantonix, Xixongo La Calzada, Bizkaia, Baionako Tipiko Kideak, Madrid 7 eta, jakina, Getxo Artea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun