Onartu berri diren 43 gradutatik, 26 Bizkaiko campusari dagozkio, 11 Gipuzkoakoari eta 6 Arabakoari. Bizkaiko campusean, ondoko ikastegiei dagozkie tituluak: 9 Zientzia eta Teknologia Fakultateari; 5 Ekonomia eta Enpresa Zientzien Fakultateari; 4 Bilboko Industria Ingeniaritza Teknikoko Unibertsitate Eskolari; 4 Ingeniaritza Goi Eskola Teknikoari; 2 Meatzeen eta Herri Lanen Ingeniaritza Teknikoko Unibertsitate Eskolari; eta 2 Nautika eta itsasontzi-makineria Goi Eskola Teknikoari. Gipuzkoako campusean, Unibertsitate Eskola Politeknikoan 6 graduko titulazio berri emango dira, 3 Filosofia eta Hezkuntza Zientzien Fakultatean, 1 Kimika Fakultatean eta 1 Enpresa Ikasketen Unibertsitate Eskolan. Azkenik, Arabako campusean, Ingeniaritzako Unibertsitate Eskolan 5 graduko titulazio berri emango dira eta bat Enpresa Ikasketen Unibertsitate Eskolan.
"Aurrerapauso handia"
Iñaki Goirizelaia EHUko errektorearen ustetan, Europako Unibertsitate Eremura egokitzeko prozesua "erritmo onean" burutzen ari da: “Gaur (ekainaren 25eko bileragatik) aurrerapauso erraldoia eman dugu 43 titulu hauek onartuz, eskaintza osatzen baikoaz. Uste izatekoa da, uztailean prozesua burututzat jo ahal izango dela. Ni neu gogobeterik nago lortzen ari garen emaitzekin. Unibertsitateko kide guztiei eskertu behar diet egin duten esfortzu handia Gobernu Kontseiluari ikasleentzat erakargarriak diren proposamenak aurkezteko. Eskaintza erakargarriak izateaz gain, benetako zerbitzu publikoa eskaintzea eta bikaintasun akademikoaren maila mantentzea uztartzen dute”. Dagoeneko EHUren Unibertsitateko Masterren eskaintza Europako Unibertsitateen Eremura egokituta dago. Eta ekainean onartutako graduko titulazioak indarrean egongo dira 2010-2011 ikasturtetik aurrera, "planteatutako eredu berriari erantzunez eta arautegietan eskatutako betekizunak bete ondoren (urte honetako otsailean argitaratutakoak)". Gobernu Kontseiluaren aurreko bileretan 16 graduko titulazio berri onartu ondoren, "gaurkoan 40 titulu berri baino gehiago onartzea aurrerapauso handia da EHUko graduko eskaintza guztia Europako Unibertsitate Eremuan homologatzeko prozesuan", adierazi zuen joan den osteguneko Gobernu Kontseiluaren bileran Goirizelaiak.
Bologna prozesura egokitutako 43 graduko titulu berri onartu ditu EHUk
2009ko eka. 30a, 15:43
EHUko Gobernu Kontseiluak Europako Unibertsitate Eremura egokitutako 43 graduko titulu berri onartu zituen joan den ostegunean, ekainak 25. Prozesu hori apirileko Gobernu Kontseiluko bileran hasi zen eta, seguruenik, uztailean amaituko da, unibertsitateko iturrien arabera. Orain bi hilabeteko batzarrean guztira 6 titulazio onartu ziren, 5 Gizarte eta Komunikazio Zientzien Fakultatean (Bizkaiko campusean) eta bat Psikologia Fakultatean (Gipuzkoako campusean). Maiatzean, Gobernu Kontseiluak hamar titulazio onartu zituen: 4 Farmazia Fakultatean eta bat Gizarte-Langintzarako Unibertsitate Eskolan (Arabako campusean); 2 Zuzenbide Fakultatean (Gipuzkoako campusean); eta bat Enpresa Ikasketen Unibertsitate Eskolan, beste bat Lan Harremanen Unibertsitate Eskolan eta beste bat Bilboko Merkataritza Ganberan (Bizkaiko campusean). Beraz, dagoeneko 59 titulazio egokitu ditu Bologna prozesura EHUk. Argazkian, Bolognaren kontrako manifestazioa Leioa eta Erandioko campusean.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun