Algortako Gazte Asanbladak (AGA) jakinarazi duenez, sei gazte algortar epaituko dituzte bihar, asteazkena, goizeko 11etan, Bilboko Buenos Aires kalean dagoen Bizkaiko Lurralde Auzitegian. Horietako bat 2006ko martxoaren 7an atxilotu zuen Ertzaintzak, Mentxakabarri gaztetxea husten ari zirela teilatura igo eta suhiltzaileek jaitsi zutenean. Beste lau aurretik, 2005eko abenduaren 3an, identifikatu zituen polizia autonomikoak, doako bideo emanaldi batera joan ostean, aipatu gune autogestionatutik irteten ari zirela. Azken gaztea etxearen jabeak pertsonalki salatu zuen. Hala ere, abokatuetako batek UKBERRI.NETi adierazi dionez, jabea baztertu egin da kausatik, eta, hortaz, ez du zigorrik eskatzen, lekuko bezala agertu beharko badu ere. "Usurpazio" delitua egotzita, lau hilabeteko isuna -12 euro eguneko- eskatzen diote gazte bakoitzari. Horretaz gain, teilatura igo zen mutilari sei hilabeteko kartzela zigorra jarri nahi diote, "erresistentzia" delitua leporatuta. Bitartean, AGAk "gogor" salatu du sei gazteen kontrako auzia, baita Mentxakabarri hustu zuten egunean "Ertzaintzak izandako jarrera oldarkorra" eta "urteetan zehar okupazioaren mugimenduaren aurka hartutako neurri errepresiboak" ere.
Algortako Gazte Asanbladak azaldu duenez, "jarrera irmoa azaldu nahi dugu gaztetxeak eta gazteon ametsak defendatzen jarraitzeko. Izan ere, egungo eredu kapitalista, patriarkal eta faxistak gure espazio askeak eskuratu eta sortzera bultzatzen gaitu eta horren bidean, okupazioa gure aukera bakarra dela aldarrikatzen dugu. Beraz, jakin dezatela, beraien mehatxu zein errepresioaren aurrean ez garela kikilduko eta tinko eutsiko diogula okupazioa eta autogestioari". Lehen aipatu sei gazteez gain, 2008ko maiatzaren 28an Lander Labajo preso politiko algortarra eta Uribe Kostako beste bi gazte epaitu zituzten BIlboko Buenos Aires kaleko Bizkaiko Lurraldeko Auzitegian, 2005ean PPk Algortako Mentxakabarri gaztetxe zenaren aurrean egin zuen agerraldi baten ostean Getxoko udaletxean izan ziren istiluetan parte hartu eta udaltzain bati eraso egitea leporatuta. Abokatuek espero zuten bezala, errugabetzat jo zituzten hirurak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun