Diane Schuur (Seattle, AEB, 1953) txikitan hasi zen jazzaz interesatzen George Shearing eta Duke Ellington pianoa jotzen entzunda. Horiek lagundu zioten pianoa jotzeko estiloa hobetzen eta, aldi berean, Dinah Washingtonek eta Sarah Vaughanek nola interpretatzen zuten ikusten hasi zen, bere estiloa hobetu ahal izateko. 1985ean fruitu ugari emango zuen kontratua sinatu zuen GRP diskoetxearekin eta abeslariaren ibilbide profesional nagusia bertan egin zen. 1997an GRP utzi eta Concord Jazz zigiluarekin sinatu zuen. Bigarren diskoetxe honekin 11 album bikain grabatu ditu, hainbat aldiz izendatu dute Grammy sarietarako eta irabazi ere egin ditu batzuk, esate baterako, 1987an eta 1988an jazzeko kantari onenaren Grammya lortu zuen "Timeless" eta "Diane Schuur and The Count Basie Orchestra" diskoengatik.
Ibilbide artistiko zabala duen arren, diskorik azpimarragarrienetako bat "Heart to Heart" (GRP, 1994) izan da, B.B. King abeslari eta gitarra-jotzaile mitikoarekin batera grabatua. Disko horrekin AEBetako Billboard zerrendako tokirik onenetan egon zen eta are gehiago proiektatu zuen nazioarteko ibilbidea. Bitxia den arren, Diane Schuurrek berez duen talentuak Europan lortu du AEBetan lortu ez duen aintzatespena.
Getxoko XXXIII. Nazioarteko Jazzaldia asteazken honetan, uztailak 1, abiatuko da Diane Schuur pianistak eta abeslariak Algortako Biotz Alai Plazan 22:30ean hasita eskainiko duen kontzertuarekin. Horrez gain, ordubete lehenago, Tobias Meinhart Quartet ariko da talde lehiaketan, Albatros 5et "Hirugarren Milurtekoa" sailean (Getxo Antzokia plazan, 19:30ean) eta Dixieño Brass Band Dixie gunean (Telletxe plazan, 18:00etan), antolakuntzak jakinarazi duenez. Bestalde, hamaikagarren urtez jarraian, aurten ere, Getxoko Jazzaldian "jam session"-ak egingo dira, The Piper's taberna irlandarrean, Biotz Alai plazako kontzertuak bukatutakoan. Gauerdira aldera, publikoak jazz onenaz gozatzen jarraitu ahal izango du, giro apartan eta lasaian. Saioetan oinarrizko talde bi izango dira, eta, horiei, egunero artista berriak gehituko zaizkie -batzuk, jaialdiko parte hartzaileak-, eta erritmo guztiz desberdin eta originalak eskainiko dituzte. Halaber, To Be Continued Brass Band taldea ariko da kaleak girotzen. Azkenik, Satistegi kafetegian Jose Manuel Hornaren argazkilariaren erakusketa egongo da ikusgai. Argazkian, Diane Schuur musikari itsuak zabalduko du Jazzaldia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun