Pasa den ekainaren 2an, "abertzaletasuna berrindartzeko" asmoz, Eusko Alkartasuna utzi eta Alkarbide sortuko zutela jakinarazi zuten alderdi sozial demokratak Gipuzkoan zituen diputatu eta legebiltzarkideek, Iñaki Galdos buru zutela. Geroago jakin zen Gipuzkoako sektore kritikoak alderdia eta webgunerako domeinuak erregistratuak zituela maiatzaren erdialdean, EAko zuzendaritzarekin negoziatzen ari zen bitartean. Pasa den ostiralean, berriz, Alkarbidek azaroaren bukaeran kongresua egingo duela iragarri zuen. Agerraldi berean, Nafarroa Bai sostengatuko dutela jakinarazi zuten eta bide batez, kongresua egin arte alderdi jaio berria gidatuko duten bederatzikotea aurkeztu zuten, tartean Izaskun Trabudua erandioztarra dagoela. Trabudua EAren Bizkaiko Lurralde Batzordekide ohia da eta 2000 eta 2007 bitartean Gizarte Ekintza zinegotzia izan zen Erandion bertan. 2007ko hauteskundetan EAren zerrendaburua izan zen, baina ez zituen behar beste boto eskuratu zinegotzia izateko. Argazkian, Izaskun Trabudua kanpaina hartako kartel batean.
Behin behineko zuzendaritza honako beste lagun hauek osatzen dute: Martin Beramendi Oiartzungo alkate izandakoa eta Alkarbideren bozeramailea izango dena, Felix Arrieta (unibertsitate irakaslea eta Gipuzkoako Foru Aldundiko Gizarte Politikako aholkularia), Iñaki Sagarzazu (Zestoako hautetsi ohia), Jose Mari Aierdi (Lekunberriko alkatea eta parlamentari ohia), Izaskun Goñi (Nafarroako EAko zuzendaritzakide ohia), Iñaki Beraza (Aguraingo alkatea eta Arabako batzarkide izandakoa), Maria Carrera (aurreko legealdian Eusko Jaurlaritzako Justizia Saileko kabineteburua), eta Jose Manuel Uribarri (Bizkaiko EAko zuzendaritzakide ohia).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun