Abian da Sopelako herrigune eta hondartzen arteko autobusa

Sopelbus garraio zerbitzua uztailaren 1etik irailaren 30a bitartean egongo da martxan, tokiko iturriek jakinarazi dutenez. Sopelako herriguneak hondartzekin lotzen dituen autobusa da hori. Bidai bateko txartelak 0,50 euroko prezioa du. Bitartean, 12 bidaietarako bonoak 5 euro balio ditu. Txartelak salgai daude jada. Autobus zerbitzuak hainbat ibilbide egiten ditu: lehena, Loiola Ander Deuna kaletik ateratzen da, Larrabasterrako metro geltoki paretik, eta Arrietara hondartzara arte doa. Iritsi aurretik hareatza horretako parkingean geldialdia egiten da. Bigarrena, Sabino Arana kaleko autobus geltokitik (Urbaso tabernaren aurrean) ateratzen da. San Pedro eliza eta kanpinerako sarrera-irteera aurreko geralekuetatik igaro ostean, Atxabiribil hondartzara arte heltzen da. Sopelbusen ordutegia 10:00etatik 20:00etara da. Bitartean, udara begira ordutegia aldatu du Sopelako Turismo Bulegoak: irailaren 13ra bitartean, astelehenetik igandera (jaiegunak barne) 9:00etatik 14:00etara eta 16:00etatik 19:00etara egongo da zabalik. Larrabasterrako Informazio Guneko irekiera atzeratu egingo da aurten. Ondorioz, Udaletxeko Turismo Bulegoan argituko dira jendearen zalantzak. Argazkian, Imanol Garai alkatea Sopelbusera igotzen / © Sopelana.net.