Getxo Rugby Taldearen Zuzendaritza Batzorde berriak udalerrian ezaguna den jende talde baten osatzen du, kirol horri oso lotua. Komunikabideei eman zien lehenbiziko mezuan, aurreko zuzendaritza batzordeen lana eskertu zuen lehenik eta behin Manu Etxebarriak; batez ere azken presidentearena, Tintxu Rodriguez, azken 25 urteetan taldea gidatu duena. Etxebarriak berak zerrendatu zituen zuzendaritza talde berriaren oinarriak izango direnak: klubaren egitura kirol eremuan indartzea, harrobi lan onarekin; kluba herritarren artean errotzen jarraitzea, azken urteetan lan hori bertan behera geratu baita; kirol lorpenik onenak, nahiz eta epe motzean izan ez; eta azkenik, klubaren egoera ekonomikoa egonkortzea.
Horretarako, lau batzorde sortu dira: Kirol Arloa, Manu Monasterio klubeko lehendakari ordearen ardurapean; Ekonomia Arloa, Jon Etxebarria nazioarteko jokalari ohia horren arduradun izango dela; Gizarte Arloa, Manu Alkizaren eskuetan egongo dena; eta Administrazio Arloa, Andres Escondrillasen zuzendaritzapean.
Egoera ekonomikoa
Egoera ekonomikoaz Jon Etxebarriak jardun zuen. Horrek "ez du eraginik izan", bere ustez, atzerriko fitxaketen politika bertan behera uzteko orduan. Aitzitik, nahiago izan dute izen handi baten aldeko apustua egitea, arduradun teknikoa alegia, "horibeltzen harrobiari ekarpen handia egin ahal diolakoan". Azkenik, Manu Monasterio lehendakari ordea taldearen harrobiaren egoeraz aritu zen. "Finean, Getxo bere erroetara itzultzen saiatuko da, bere baliabideak kapitalizatuz eta oinarri horrekin gora begiratuz, Brice Bevinen alde egindako apustu handiarekin", azaldu zuenez. Bestalde, klubeko idazkaria Santi Perez de Ziriza izango da. Gainerako kideak, lehen aipatutakoez gain, hauek izango dira: Joseba Aranguren “Morotxo”, Joseba Fernandez , David Etxarri, Jose Luis Martinez “Karra” lehengo entrenatzailea, Jose Ignacio Perez “Ortzi”, Alberto Zubeldia, Bego Maite Jimenez, Victor Agirre eta Jesus Javier Martinez “Pibe”.
Ohorezko B Mailara jaitsi eta hauteskunde prozesuaren ostean, Zuzendaritza Batzorde berria dauka jada Getxo Artea Rugby Taldeak. Manu Etxebarria Getxoko Udalaren zinegotzi ohia izango da burua, klubarekin lotura estua daukaten jokalari ohiz, teknikariz eta zaletuz inguratua. Presidente berriak astearteko aurkezpenean azaldu bezala, "kluba behetik berreraiki" nahi dute, "harrobi lana indartuz". Hain zuzen ere, Zeelanda Berriko Brice Bevinek, Espainiako selekzionatzaile ohiak, izango du horren ardura. Bera izango da kirol zuzendari berria. La Vila taldean Espainiako ligako entrenatzailerik onena izendatua izan denak harrobiarekin lan egiteko erronka onartu du. Horretaz gain, Bricek berak zuzenduko du Getxo Arteako lehenengo taldea, Ohorezko B Mailan. Argazkian, Zuzendaritza Batzorde berria astearteko aurkezpenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun