Agortu dira Michel Camilok Getxo Jazz jaialdian bihar eskainiko duen kontzerturako sarrerak

Duela sei urte gertatu zen moduan, Michel Camilo pianista ospetsuak Getxoko Nazioarteko Jazzaldian bihar eskainiko duen saiorako sarrerak agortu dira jada. Artista dominikarra buru duen hirukotea Algortako Biotz Alai plazan ariko da, 22:30etik aurrera, antolatzaileek jakinarazi dutenez. Camiloren aurretik, Points laukote txekiarra izango da leku berean, 21:30ean. Dixie Gunean (Telletxe plaza), berriz, Marmara Dixieland Band taldea ariko da 18:00etan eta Hirugarren Milurtekoa atalean, (Getxo Antzokia plaza, 19:00etan), KB Connection boskotea. Azkenik, ohi bezala, The Piper's taberna irlandarrean "jam session" bat izango da Michel Camiloren saioa amaitu eta gero. Argazkian, pianista dominikar ospetsua.