Aipatu protestan, Iñaki Etxebarriari eta Euskal Herriari elkartasun internazionalista eta iraultzailea adierazi zieten ehunaka lagunek, tartean Gazteria Komunistetako kideak, Elkartasun Internazionalistarako Batzordekoak edo unibertsitateko ikasle eta irakasleak bertan egon zirela. Aldiz, Antonio Ledezma Caracasko metropoliaren alkatea eta Oscar Perez Comando Nacional de la Resistencia 2002ko Estatu kolpearekin lotutako erakundearen kidea inguruetara hurbildu zirenean, eskumako buruzagien ehun bat jarraitzailek eraso egin zieten komunista eta internazionalistei. Horretarako, makilak, kaskoak eta ostikadak baliatu zituzten, metropoliko Polizia, hasieran, geldi geratzen zen bitartean. Azken uneetan berriz, Etxebarriaren aldekoen aurka gas negar-eragilea bota zuten Ledezmaren aginduetara dauden poliziek.
Etxebarria apirilaren 21ean atxilotu zuten Venezuelan eta, ordutik, gatibu dago, Espainiara estraditatzeko ala libre uzteko prozesuak aurrera darraien bitartean. Amnistiaren Aldeko Mugimenduak azaldu duenez, iheslari algortarra 1981eko abuztuan atxilotu zuten Lemoizko zentral nuklearraren aurkako kanpainan Iberdueroko zentral baten kontrako ekintza burutzera zihoala eta 1987ko apirilean kaleratu zen Herrera de la Mantxako espetxetik. 1994an alde egin zuen Algortatik, poliziaren atxiloketa ekiditeko, eta harrez gero ihesean egon da.
Noticiero Comunitario de Catia tokiko telebista saioak pasa den ekainaren 30ean, Venezuelako Justizia Auzitegi Gorenaren aurrean izandako istiluei buruz egindako erreportajea:
Joan zen asteartean egin zen Venezuelan Iñaki Etxebarria iheslari politiko algortarraren estradizio epaiketa. Bertan, fiskalak estradiziorik ez emateko eskatu zuen, baina hori ez zen nahikoa izan prozesua bertan behera uzteko. Gainera, Etxebarriaren atxiloketa ilegala izan zeneko zantzuak aurkeztu zituzten eta baita estradizioa epez kanpokoa dela esan ere. Era berean, Etxebarria atxilotu zuten funtzionarioen aurkako ikerketa zabalduko duela agindu zuen Fiskaltzak, ABPk jakinarazi duenez. Gauzak horrela, Etxebarria espetxean jarraitzen du, datorren ostiralean auzialdi berria izan arte. Bestalde, pasa den asteartean Auzitegi Gorenaren aurrean Etxebarriaren alde egindako elkarretaratzearen berri eman du Koska irratiak, bideo baten bidez. Argazkian, ekainaren 12an Etxebarriaren askatasuna aldarrikatu zuten Montevideon (Uruguai) / Xanti Revueltas - RebelArte.info.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun