Krisiari aurre egiteko asmoz, "egonkortasun hitzarmena" sinatzeko proposamena egin zion Erandioko PSE-EEk egun gehiengo osoa duen EAJren Udal Gobernuari, ekainaren 18ko osoko bilkuran. Hain zuzen, egun horretan aukeratu zuten Joseba Goikouria alkate, Mikel Arieta-Araunabeñaren ordez. Juan Otermin tokiko sozialisten bozeramaileak kritikatu duenez, "zoritzarrez, gogoan baino ez zuten hartu, alkateak ez du besterik egin". Hala ere, berriro luzatu diote eskua Goikouriari eta Udal Gobernu Batzordeari PSEkoek. Oterminen hitzetan, udalerrian ematen ari den langabeziaren "hazkunde geldiezinari" -%16,5, ia 1.600 lagun- eta "hurrengo bi urtetako ekitaldien aurreikuspen txarrei" aurre egitea dira proposamenaren helburuak; baita "gehiengo osoa izan arren, EAJk eguneroko gestioan aurkitzen ari den zailtasunei" aurre egitea ere. Argazkian, Juan Otermin Erandioko PSE-EEren bozeramailea.
Bost ardatz ditu oinarri sozialisten ekimenak: "herstura ekonomikoa, gizarte prestazioak hobetu eta blindatzea, HAPOren idazketari ekitea, enplegu hitzarmen lokala eratzea; eta inbertsio eta instituzioen diru-laguntzak erakartzeko ekintza plana lantzea", Erandioko PSE-EEren bozeramaileak zehaztu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun