Imanol Landa Getxoko alkateak, "erabateko gaitzespena" adierazi dio ustez Algortan bart jazotako bortxaketari. Udal agintariak adierazi duenez (mp3), “eraso mota horiek emakumeenganako indarkeriaren adierazpen larria dira”. Landak zehaztu du Udalak sentiberatze, hezkuntza, segurtasun eta Udaltzaingoren ikuspegietatik, mota horretako erasoak ez gertatzea helburu duten politikak eramango dituela aurrera, eta “gertatutakoa ikusita ahalik eta ardura handienarekin" egingo dutela. Helburu hori lortzeko, Udalak dituen baliabide guztiak erabiltzeko konpromisoa agertu du alkate getxoztarrak. Keltse Eiguren Gizarte Zerbitzuetako zinegotziak ere "gaitzespena eta arbuioa" agertu ditu, “sexu erasoa indarkeria sexistaren adierazpena baita eta, beraz, giza eskubideen urraketa larria, emakumezkoei oinarrizko eskubideak disfrutatzea galarazten diena”. Azkenik, gertatutako bortxaketa "sutsuki" arbuiatu du Eusko Jaurlaritzaren Genero-Indarkeria Biktimei laguntzeko Zuzendaritzak. "Emakumeen aurkako biolentzia errotik kentzeak guztion ahalegina eskatzen du. Hortaz, gizartearen arazo larri honen aurrean tolerantziarik ez aurkezteko eskatzen diegu hiritar guztiei", Gasteizko exekutiboko arduradunek aipatu dutenez. Argazkian, Landa eta Eiguren prentsaurreko batean.
Arrisku egoera bizi diren emakumeei hainbat gogorapen egin dizkie Getxoko Udalak. Alde batetik, Udaleko Gizarte Zerbitzuetara jo dezaketela (944 660 101), han aholkularitza juridikoko zerbitzua eta arreta psikologikoa lortuko baitituzte. Beste aldetik, Eusko Jaurlaritzako Telefono Arreta Zerbitzura (900 840 111), Udaltzaingora (944 660 202), Ertzaintzara (944 063 420) edo SOS Deiak larrialdietako zerbitzura, 112 zenbakira ere, dei dezaketela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun