Barrakak Ereaga hondartzan egongo dira uztailaren 24tik abuztuaren 3ra arte eta 17 atrakzio izango dira, iaz bezala (tartean, autotxokeak, matxinsaltoa, bikingoen ontzia eta scalextric-txikia, baita tiro egiteko etxolak, txiki-park eta txurro dendak ere). Hara jaisteko igogailua gaueko 12ak arte zabalik egongo da.
Txosnei dagokienez, Algortako metro geltoki ondoko parkingean herri lanak egiten ari diren arren, bertan mantendu nahi ditu Udalak. Bizkerre futbol taldeak Tangora plazan jarri ohi duen alkoholik gabeko txosna, ordea, Telletxe plazara mugitzeko asmoa dute tokiko arduradunek. Tangora etxean ere obrak egiten dabiltza. Bitartean, Portu Zaharrekoak lautadan jarriko dira, itsasoari begira; baita Jenaratxu inguruan ipini ohi duten jai batzordeko txosna ere. Azkenik, Itzubaltzetan, haurrentzako jolasak Areetako Xake plazara eramango dira eta, kasu batzuetan, Artatza parkera; Txabarri-Zuazo parkearen ere herri lanak daudelako.
Ordutegiak iaz bezala mantendu nahi ditu Udalak. Musika zuzenean dagoenean (berbenak...) 01:30ean eten egin beharko da (02:30ean hurrengoa jai eguna bada). Txosnek musika kendu behar izango dute 03:30ean (04:30ean hurrengoa jai eguna bada); eta ordu bete beranduago itxi, 04:30ean (05:30ean hurrengoa jai eguna bada).
Arriskuen murrizketa
Gizarte Zerbitzuek eta Gazteria Sailak, iaz bezala, Getxoko jai handietan alkoholaren eta beste droga mota batzuk hartzeari lotuta ager daitezkeen arriskuak murrizteko ekimena jarriko dute martxan. Horrela, karpa bat jarriko dute alkoholemia-kontrol boluntarioak egiteko eta karpa-furgoneta bat (testing programa) ere, informazioa emateko eta drogak aztertzeko zerbitzuekin, kalteak eta arriskuak jaitik bertatik lan egin ahal izateko. Euskara eta Gazteria arloetako zinegotzi Koldo Iturbek aurreratu duenez, ekimen honen helburua da “nagusien artean alkoholaren kontsumo arduratsua bultzatzea eta, adin gutxikoei dagokionez, ez hartzeko mezua helaraztea eta txosnei eta tabernei gogoratzea ezin dietela adin gutxikoei alkoholdun edariak eman, ezta horiek beraiek saltzen baimentzen ere”.
Alkoholemia kontrola uztailaren 25ean jarriko da, Paella egunean, abuztuaren 7an Romoko jaietan eta abuztuaren 14ean Portu Zaharrean. Kontrolen ordutegia honako hau izango da gauerditik goizaldeko hiruetara, Paella egunean izan ezik: egun horretan 17:00etatik 20:00ak arte izango da. Testingari dagokionez, hautatutako datak, lekuak eta ordutegiak honako hauek izango dira: San Nazio jaietan, abuztuaren 1ean; Itzubaltzetan, abuztuaren 7an; eta Portu Zaharrean, abuztuaren 14an. Kasu guztietan ordutegia 00:00etatik 03:00etara izango dira.
Algortako erdigunea arratsaldeko 5etatik aurrera itxiko dute San Inazio jaietan
Algortako erdigunea trafikorako itxiko dute arratsaldeko 5etatik goizeko 6ak arte -aurrekoetan gauez baino ez dute egin- Algortako San Inazio jaietan, hau da, uztailaren 29tik abuztuaren 1era arte. Hau da Getxoko Udalak aurreikusi duen "nobedaderik nabarmenetakoa" udalerriko jai nagusietarako. Horietarako, Koldo Iturbe Kultura zinegotziak, “bakean bizitzeko eta jaia eta herritarren atsedena tartekatzeko nahia” adierazi du. Iturbek gonbidapena luzatu die herritarrei “jaietan politika alde batera uzteko, garraio publikoa erabiltzeko eta jaiak ere euskaraz bizitzeko”. Azken hori dela eta, Udalak “Euskaraz Bizi” kanpainarekin segituko du aurten ere. Bitartean, Udalak iaz emandako diru-laguntzak mantentzea erabaki du. Horrela, San Inazioetako jai batzordeak 32.000 euro jasoko ditu; Itzubaltzeta / Romo eta Pinuetakoak 22.000 euro eta Algortako Portu Zaharrekoak 14.000 euro. Halaber, 8.000 euro bana emango die jai batzordeei umeentzat jolasak ipintzeko eta kontzertu bana ere ordainduko dio bakoitzari: “Piperrak” San Inazioetan (uztailak 31), “Betagarri” eta “Trikizio” Itzubaltzeta / Romon (abuztuak 5) eta “Kresala” Portu Zaharrean (abuztuak 12). Udalak hainbat azpiegitura eta elektrizitatea ere ordainduko ditu. Argazkian, ikurrinari agurra iazko San Inazioen hasieran.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun