Latinoamerika, Europa eta Afrikako dantza taldeek parte hartuko dute Berangoko Folklore Jaialdian
Hiru kontinentetako zortzi taldek parte hartuko dute uztailaren 17tik 19ra bitartean ospatuko den Berangoko Folklore Jaialdian. Simon Otxandategi dantza taldeak antolatzen duen jaialdiaren hirugarren edizioan, Latinoamerika, Europa eta Afrikako konpainiek esku hartuko dute. Egitarauari dagokionez, ostiralean, Scottishpower Pipe Band (Eskozia), Flint (Flandes), Regionalny Zespol Piesni I Tanca (Polonia) eta Simon Otxandategi bera ariko dira 20:30etik aurrera Lantzarten. Konpainia bakoitzak 25 bat minutuko emanaldia eskainiko du. Larunbatean, ordu eta toki berean, Xiberotarrak (Zuberoa, Euskal Herria), Flint, Regionalny Zespol Piesni I Tanca, Goizaldi (Donostia, Euskal Herria), Scottishpower eta Jammu balleta (Senegal) izango dira protagonistak. Jaialdia igandean bukatuko da eta agertokiak eta ordua aldatuko dira. Horrela, 11:00etatik aurrera, talde guztiak bilduko dira Berangoko metro geltoki inguruan, eta ordu erdi geroago kalejira egingo dute denek elkarrekin herriko kaleetan zehar. Eguerdian, Jalisco Estatuko Ballet Folklorikoa (Mexiko) ariko da Lantzarten. Ondoren, 15:00etan, talde guztiek parte hartuko dute bazkari herrikoian. Bukatzeko, 17:00etan, Egan taldeak girotutako erromeria izango da. Argazkian, Senegaleko Jammu balleta / Ass Ndiaye.
"Taldeak ez datoz hona dantzatzera bakarrik, gurekin bizi dira, gurekin egiten du lo, gurekin ibiltzen dira eta gurekin datoz hondartzara. Gero, euren herrialdeetara joango dira eta Berango eta Euskadi nolakoak diren kontatuko dute", adierazi du Simon Otxandategi taldeko presidente Iñaki Gonzalezek. Horrek aitortu du herritarren laguntzarik gabe ezinezkoa litzatekeela jaialdia antolatzea, atzerriko gonbidatu guztiek Berangoko familien etxeetan igarotzen baitituzte egunak eta bertan egiten baitute lo. Bazkariak ere -200 lagun inguru bilduko dira- sartzen dira izaera herrikoia duen jaialdian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun