"Zigor hiltzaile", "Hilda zaude", "Gora Espainia terrorista" eta "Hil zaitezte" leloak espainolez pintatu eta atariko oin-zatarra eta sasi batzuk gasolinaz erre dituzte ezezagunek, gaur arratsaldean, Zigor eta Arkaitz Goikoetxearen aita-amen Azkorriko (Getxo) baserrian. Eraikin osoa egurrezkoa denez, atariari su emateak arrisku larria eragin zitekeela esan dute hurbilekoek. Mutilen amak UKBERRI.NETi adierazi dionez, 14:00ak aldera atera dira bera eta senarra kanpoan bazkaltzera, eta bi ordu beranduago, 16:00ak inguruan, hots egin diete auzokideek, etxea erasotu dutela esanez. Heldu artean, Ertzainari eman diote abisua eta baserrian bertaratu dira polizia autonomikoak eta udaltzainak. "Egin beharreko argazkiak atera dituzte, besterik ez", aipatu du amak. Izan ere, orain 8 urte inguru, Arkaitz eta Zigor atxilotu zituzten batean, negutegien oihalak apurtu zizkieten eta ordutik ez dute ikerketen berririk. Bitartean, PPk kontuak eskatu dizkio Rodolfo Ares Herrizaingo sailburuari (El Correo Español), Zigor Goikoetxeari asteazkenean Algortan egindako harreragatik. Bere aldetik, haizeak arrotzen dabil Alfredo Perez Rubalcaba Espainiako Barne ministroa (El Correo Español), aipatu ekitaldiaren harira. Argazkian, suak utzitako arrasto batzuk eta ezezagunek Zigor Goikoetxeari egindako heriotza mehatxua. Argazki gehiago ikusteko sakatu hemen.
Erasoa "gauza puntuala edo prestatu gabea ez" dela diote Zigor eta Arkaitz Goikoetxearen familiarrek eta hurbilekoek. Batik bat, bertan bakarrik bizi diren aita-amak etxean ez zeuden unean gertatu delako. Euren arabera, erasotzaileak zelatatzen ibili dira aurretik. Bestalde, pintaketen grafiak eta erasoak horrenbesteko indarra izateak hiruzpalau pertsona izan direla pentsatzera eraman dezake. Sei mila euroren trukean bada ere, joan den asteazkenean askatu zuten Zigor Goikoetxea; bere urtebetetze egunean hain zuzen ere. Espainiako Auzitegi Nazionalak orain dela hilabete bat kaleratu zuen getxoztarraren aurkako epaia. Bertan, bi urteko espetxe zigorra, Marisa Arrue PPren zinegotziari 6.000 euroko isuna ordaintzea eta berarengandik 300 metro baino urrunago egotera zein Getxotik at, bizitzea ezarri zioten Goikoetxeari. Era horretan epaileek ontzat eman zuten Marisa Arruek gaztearen aurka balizko heriotza mehatxuengatik jarritako salaketa. Epaiketa apirilaren 14an egin zen eta bertan lekuko guztiek ukatu zuten Goikoetxeak mehatxuak egin izana. Atzo bertan bere argazkia kendu zuen Azkorriko gazteak, Koska irratiak Sopelako jaietan daukan txosnatik (argazkiak ikusi).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun