Akanpadaren egitaraua:
- Bihar ostegunean, Izurtzako herritarrei akanpadaren aurkezpena egiteko, plazan luntxa ospatuko da arratsaldeko 7etan, eta jarraian Eneko Abasolo “Abarkas”, Miren Amuriza eta Eñaut Uruburu “Lepotxo” bertsolariekin baserriz baserri bisita egingo dute.
- Ostiralean, berriz, akanpadaren muntaketa lanetan emango dute eguna, eta arratsaldeko 18:30ean Orkresta Nazionala elektro-txarangarekin kalejira erreibindikatiboa egingo da Durangoko kaleetan. Jarraian, 21:00etan “AHTren izenean Amen!” antzezlana izango da Durangoko San Ana plazan.
- Larunbatean, goizeko 9:30ean Bizikleta Martxa abiatuko da Izurtzatik Elorriora. 12:00etan hamabietako herrikoia eta kalejira egingo dira Elorrion. Arratsaldeko 4etan, “TAV: Las razones del NO” liburuaren aurkezpena egingo da Izurtzan, Josu Larrinaga eta Iñaki Barcenaren eskutik. 15etan, tailer etnobotanikoa izango da: “Landareen erabilera tradizionalak Euskal Herrian” (sendabelarrak, jateko belar eta fruituak…), Dani Perez eta Gorka Menendez-en eskutik. Eta eguna amaitzeko, 21:00etan kontzertua antolatu da Durangoko gaztetxean: AHTren aurkako ekintzen bideoa, La Banda del Abuelo eta beste talde batekin.
- Igandean, goizeko 9:30ean mendi ibilaldia izango da, Mañaria eta Atxarteko harrobiak eta inguruak ezagutzeko, tartean Markomin-Goikoa, Atxarte, Zallobenta eta Mutxate. 14:00etan, bazkaria egingo dute Mañarian. 17:00etan, ordea, proiektu txikitzaileen aurkako taldeen Topaketa egingo da Izurtzan, Jaizkibel Bizirik, Mendiak Aske, Coke plantarik ez, Errausketaren aurkako Koordinadora, Tentsio Altuko Linearen kontrako taldea, eta “Durangaldeko Proiektu desarrollistak” txostenaren egileekin. 20:00etan, jendarteko jolasak eta herri kirolak. 23:00etan, poesia emanaldia eta antzezlana izango dira frontoian: “Sopa sin sorber”, “En el aire” eta “El artista del hambre”.
Bihar, uztailak 23, ostegunarekin, hasiko da Abiadura Handiko Trenaren (AHT) aurkako akanpada, Izurtzan (Durangaldea). AHTren Aurkako Asanbladak urtetik urtera antolatu duen kanpaldi honek "AHTren aurkako mobilizazio-gune izan nahi du, baita egungo gizarte eredu garapen-zalekeriaren aurrean sortu diren gatazka eta dinamika sozial eraldatzaileen arteko topagunea ere", antolakuntzak zabaldu duenez. Hortaz, bihartik aurrera eta abuztuaren 2ra bitarte, hainbat ekimen egingo dira Izurtzako akanpadan, hala nola hitzaldiak, eztabaidak, mendi-martxak, protesta ekintzak, eta abar, "proiektu suntsitzaileen aurka aritzen diren pertsonak ezagutu eta erresistentzia eremu bat osatzeko, garapen-zalekeriari eta beste zapalkuntzei aurre eginez". Bestalde, AHTren Aurkako Asanbladak gogor salatu du Espainiako Sustapen Ministerioak "AHTren obrak 'Euskal Y'-aren Gasteiz-Bilbo ibilbide osoan hedatu eta inposatzen ari dela". Hori dela eta, akanpadarekin batera AHTren obretara manifestazioa egingo dute abuztuaren 1ean, larunbatarekin, eguerdiko 12tan Durangoko Andra Mari plazatik abiatuta. Argazkian, akanpada iragartzeko prentsaurrekoa / AHTren Aurkako Asanblada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun