Bestalde, Herri Babesaren aurrezaintza zerbitzu eta trafiko neurri bereziak ezarriko dira Aixerrotako Paella Lehiaketa egunean. Gauzak horrela, goizeko 8:00etatik 9.30era baimenduta egongo da kotxeak sartzea, parte hartzaileek eguna pasatzeko behar duten material guztia euren tokietara hurbil dezaten, udal iturriek zehaztu dutenez. Goizeko 9:30erako, baina, Aixerrotako landetan ezin izango da autorik geratu. Udalak zirkulazioaren noranzko bakarra ipiniko du, eta ondorioz, jai-eremura Aingeruaren Etorbidetik eta Gustavo Adolfo Becquer kaletik sartu beharko da. Bertatik ateratzeko, berriz, Bosgarrena, Santa Marinako Haitza eta Maidagan kaleak hartu beharko dira.
Prebentzio zerbitzuak
Bitartean, jai-eremuan zein inguruetan udaltzainak izango dira, "jaiarekin bat egingo duten milaka herritarrei edozein zalantza argitzeko", udal iturriek aipatu dutenez. Getxoko DYA elkartea arduratuko da istripuren bat duten pertsonak artatzeko, eta horretarako lehen sorospen postuaeta bi anbulantzia izango dituzte, bidegorriaren ondoan, jai-eremuko sarrera-irteeraren aurrean eta atzealdean. Edozein ezbehar jaso edo larrialdirik izanez gero honako hau da Babes Zibilaren eta Udaltzaingoaren Larrialditarako telefono zenbakia: 944 660 202.
Larunbat honetan, uztailak 25, ospatuko da 54. Paellen Nazioarteko Lehiaketa, Aixerrotako landetan, Itxas Argia taldeak antolatuta. Santiago egunean, hain zuzen ere. Parte hartzaileek 10:30etatik aurrera izango dute lehiaketan izena emateko aukera. Paellen aurkezpena, berriz, 13:30etik 14:30era egin beharko da. Azkenik, 17:30ean izango da sari banaketa. Bitartean, egongo da zertaz gozatu: Euskadiko Sokatira txapelketa (11:00), Itxas Argia dantza taldeko txikien erakustaldia (12:00) eta bertso saioa (13:00), hurrenez hurren. Aipatu azken saio horretan, Josu Landeta, Beñat Vidal eta Itxaso Paya igoko dira agertokira. Festa egunari bukaera bikaina emateko Akerbeltz taldeak eskainiko du erromeria, 18:30etik aurrera. Argazkian, iaz aurkeztutako paelletako bat. Irudi gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun