Zerbitzua hobetu eta Ereagako hondartza inguruen -Portu Zaharra, Kirol Portua...- eta Algortako erdigunearen artean dauden esparru eta zerbitzuak, publiko zein pribatuak, oinezkoentzat eskuragarriago egiteko asmoz, Maria Kristina parkea eta hareatza lotzeko igogailuaren ordutegia zabalagoa izango da udan. Uztailaren 29tik irailera arte izango da indarrean eta horren arabera igogailuaren zerbitzua 23:00etan itxiko da, igandea eta osteguna bitartean, eta 00:30ean ostiral, larunbat eta jaiegun bezperatako gauetan, baita San Inazio eta Portu Zaharreko jaietan ere. Zerbitzua 10:00etan zabalduko da. Argazkian, Ereagara jaisteko igogailua.
Udaletxean jasotako iradokizun asko eta askori erantzun nahi zaie neurri horrekin, tokiko iturrien arabera: “helburua da Ereaga eta inguruetan dauden hamaika erakargarriez gozatu ahal izatea, aro honetan egunak luzeagoak direla baliatzearekin batera norberaren ibilgailua hartzea ekidingo duen garraiobidea eskura edukiz, haiek, ibilgailu pribatuak, zaildu egiten baitu bai hondartzara bai Algorta auzoko goiko aldera iristea. Horrez gainera, ordutegia zabalduz inguruko taberna eta antzekoetara jende gehiago sartuko da”, aipatu du Komunikazio eta Herritarren Arreta Arloko zinegotzi Josu Loroñok. Aurtengo ekainaren 30ra arte 30.000 lagun baino gehiagok erabili dute igogailua. Iazko epealdi beraren aldean, orduan 28.217k erabili zuten, %6 handitu da zerbitzuaren erabilera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun