Getxoko Udaleko Bozeramaileen Batzarrak 2009ko uztailaren 29an onetsitako adierazpen instituzional honen jakitun geratzea
ETA talde terroristak, gaur, uztailak 29, asteazkena, Burgosko guardia zibilaren kuartelaren aurka egindako atentatua dela eta, Getxoko Udaleko Bozeramaileen Batzordeak hurrengoa adostu du:
1.- Atentatu doilor hau kondenatu eta gaitzestea, eta haien helburuak erdiesteko pertsonen bizitza gutxietsiz indarkeria eta terrorismoa erabiltzen dituztenak erabat arbuiatzea.
2.- Atentatu honetan kaltetutakoei elkartasuna eta hurbiltasuna adieraztea eta Estatuko Segurtasun Indar eta Kidegoak eta Ertzaintza babestea terrorismoaren aurkako borrokan.
3.- ETAri behin betiko eta berehala desagertzeko eskakizuna helarazi nahi diogu, era horretan euskal gizartearen erabateko gehiengoaren borondatea errespetatuz.
4. Une honetan, inoiz baino gehiago, askatasunean eta demokrazian oinarritutako bideak estimatu eta gorestea, ETAren jarduna mespretxatuz.
5.- Zuzenbide estatuak dituen baliabideetatik, batasun demokratikotik eta oinarrizko eskubideen defentsa eta errespetutik, denok terrorismoari zilegitasun politiko eta soziala kentzeko eta behin betiko garaitzeko lan egin dezagun dei egitea.
Gaur goizaldean Burgosen Guardia Zibilaren kuartelaren aurka izandako atentatua gaitzetsi du aho-batez Getxoko Udaleko Bozeramaileen Batzarrak. Atentatua goizeko laurak aldera izan da, ordu horretan bonba-furgoneta bat lehertu eta 60 bat zauritu arin eragin dituela. "Ikerketa iturriak" aipatuz Berria.info-k zabaldu duenez, ETA erakunde armatuari leporatzen diote atentatua egin izana, horretarako 200 kilo lehergai erabili ei dituztela. Getxon onarturiko testuan, EAJ, PP, PSE-EE eta Alternatiba taldeek "atentatu doilor hau" gaitzetsi dute, baita "haien helburuak erdiesteko pertsonen bizitza gutxietsiz indarkeria eta terrorismoa erabiltzen dituztenak erabat" arbuiatu ere. Era berean, Guardia Zibila, Espainiako Polizia eta Ertzaintzari bere babesa eman diote "terrorismoaren aurkako borrokan". ETAri, berriz, bere mesprezua erakutsi eta desagertzeko eskatu diote. Argazkian, Imanol Landa alkatea eta Getxoko Udal taldeen bozeramaileak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun