Punta Galea txirrindularitza elkarteak antolatzen duen Getxoko Zirkuitua irabazi zuen esprintean atzo Euskaltel taldeko Koldo Fernandez de Larrea txirrindulariak. Lasterketaren 64. edizioan, Berangoko Ricardo Otxoa zenaren omenez egin den 9.an, Juan Pablo Forero kolonbiarra gelditu zen bigarren, Mikel Gaztañaga hirugarren tokian utziz. Ohikoa denez, hainbat ihesaldi saiakerak izan ziren probak iraun zuen lau bat ordutan. Nagusiena eta lehena hamabikote batek sortu zuen, tartean Iñaki Isasi Euskalteleko kidea zegoela. Baina helmuga gero eta gertuago zegoela tropelak irentsi egin zituen. Ondoren Jonathan Castroviejo Orbeako txirrindularia saiatu zen bakarrean baina 15 kilometro baino ez zirela falta neutralizatu zuten. Gustavo Dominguez eta David Belda ere azken kilometrotan egin zuten hamaika ahalegin zorte berbera eskuratuz. Azkenean, Euskaltel taldeak esprinta prestatu eta Koldo Fernandezek lana biribildu zuen helmugako pankartaren pean. Koldok pasa den ostegunean berritu zuen kontratua Euskaltelekin 2010erako. Bestalde, egunekoa ezustekoa Meitan talde japoniarraren maila altua izan zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun