Sonia Polo Sopelako alaba eta Bilbon hainbat urte bizi ondoren aurtengo Aste Nagusiko txupinera denari heriotza mehatxua egin diotela salatu dute Bilboko Konpartsek eta LABek. Izan ere, Berria.info-k jakinarazi duenez, atzo egunkari batetik ebakitako Poloren argazkia eta 9mmko kalibreko parabellum bala bat zeraman gutun bat jaso zuten Bilboko Udalean. "Jaietako Buruari" zuzendutako mehatxu eskutitza zen eta kasua ikertzen ari dira, Ertzaintzak jakinarazi duenez. Konpartsek eta sindikatuak berriz argi daukate gertatutakoa eta Sergio Polo ETAko kidearen arreba izateagatik Sonia Poloren aurkako kanpaina egin zuten PP eta PSE-EEri zein haien jarraitzaileei mehatxuaren ardura leporatu diete ". Haien ustez, "jai giroa kakaztu nahi dute eta atentzioa beste gai batzuetara bideratu". Horren ordez, Aste Nagusia "konfrontazio politikorako" erabiltzeari uzteko eskatu diete alderdi konstituzionaleei. Bestalde, "Elkartasun osoa" adierazi diote Sonia Polori, eta "eraso faxista hauek guztiz baztertu" dituzte. Gainera, Polo babesteko elkarretaratzea deitu dute etzi, ostirala, eguerdiko 12etan Arriaga antzokiaren aurrean. Argazkian, Bilboko Konpartsen ordezkariak eta txupinera izandakoak Poloren aldeko aurreko prentsaurreko batean / © Txinbotarrak.org.
Bestalde, Rodolfo Ares Herrizaingo sailburuak "gaitzetsi eta arbuiatu" egin du pertsonen askatasunei eta segurtasunari erasotzen dien ekintza "erabat mespretxagarria" hori. Aresek azpimarratu duenez, "Ertzaintza mehatxu hau argitzeko eta egileak atxilotzeko lanean ari da".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun