Algortan izandako ur mozketa "oso txarto kudeaketu" izana leporatu dio EAJri PPk
Pasa diren astelehen eta asteartean Algortako ia 40.000 lagun bost orduz ur barik utzi zuen saneamenduko matxuraren kudeaketa dela eta erantzukizunak eskatu dizkio Getxoko Udal Gobernuari PPk. Marisa Arrue popularren bozeramailearen ustez, tokiko gobernuaren kudeaketa "oso txarra" izan zen eta bere ustez matxura lehenago konpon zitekeen eta baita auzokideei arazoaren berri azkarrago eman ere. Hori dela eta, jelkideek algortarrak "alde batera utzi" zituztela eta "batez ere ostalariei kalte handiak eragin zizkietela" kritikatu dute PPkoek. Arrueren ustez, jarrera horren atzean Udala opor egoeran utzi izana dago. Irakurketa horretatik oso urrun, Udal Gobernuak ziurtatzen du astelehenean matxura ez zela hain handia eta asteartean goizean bertan hasi zirela ezbeharra konpontzen. Gainera, ordu gutxi batzuetan, arratsaldeko 3etatik aurrera ura apurka apurka gune ezberdinetan eman zutela diote. Argazkian, behargin bat estolderiatan lan egiten, artxiboko irudi batean.
Matxura astelehen arratsaldean gertatu zen telefonia enpresa batentzako zenbait lan egiten ari zen hondeamakinak Sarrikobaso eta Piñaga kale artean dagoen sareko tutu bat zulatu zuenean. Hasiera batean matxurak ez zuen hain handia zenik ematen baina orduak joan orduak etorri zulaketak eragindako ur-ihesa gero eta handiagoa zenez Getxoko Udaleko Uren Zerbitzuak sareko balbulak itxi eta ur-hornidura eten egin behar izan zuen astearte goizeko lehen orduetan auzo osoan, Algortan 39.700 bat biztanlerengan eragina izan duen problema konpontzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun