Algortako etorbidean 1936an zabaldutako Gurugu taberna dagoeneko historia da. Pasa den ostegunean, hilak 20, Bernardino Azkorra ugazabak azken aldiz ireki zuen ostatua, betiko bezeroak txikito eta zuritoen artean agurtzearren. "Deia" egunkariak zabaldu duenez, "filmeko gaiztoa sentitzen naiz ixteagatik" aitortzen zuen Bernarrek, bezero eta lagunek ezagutzen duten moduan. Izan ere, 48 urterekin ostalaritza utziko du Azkorrak, tabernak gero eta gutxiago ematen duelako, antzinako koadrilak gero eta zaharragoak diren bitartean. Algortako ostatu mitikoak txikiteotik kinitoetara jauzi egin eta gazte koadrilen babeslekua ere bilakatu bazen ere "guztion taberna" den Gurugu mantentzeko haina ez da izan. Horrela, tabernako hormetan zeuden lehenengo Paella Eguneko argazkiak, Getxo Rugbyren lehen jokalari taldearen erretratua, erbestean jokatu zuen Euzkadiren lehenengo selekzioaren afitxak edo Athleticarekin lotutako anekdotak, koadrila bakoitzaren gora-beherekin, Indabada mundialen osteko musika-txikiteoekin, inauteri alternatiboen ibilbideekin, edota Txorimalo gaztetxearen urteurreneko ekitaldiekin batera izango dira hainbat guaito belaunaldien memoria kolektiboan.
Dagoeneko barra eraitsita, bi etxebizitza egingo dira topagune historikoaren lekuan. Baina, lanak orain hasi badira ere, iaz hartu zuen erabakia Bernarrek, hainbat koadrilen artean izua sortu zuela. Horrela, abenduan, "Gurugu salba dezagun" taldea osatu zuten sare sozialetan, 225 kide izatera heldu zirela. Erregeen Egunerako, hitzordua jarri zuten ostatuan, jabeari galdetu eta konbentzitzen saiatzeko, baina lagunen presioek ez zuten helburua lortu. Urtarrilaren 27an, berriz, Getxoko Udal Gobernu Taldeak obra lizentzia onartu zuen, eta Alango auzoko hiltegia bezalako beste eraikin historiko baten etorkizuna amatatu zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun