Ostegunean, abuztuak 27, Itsasadarraren egunean parte hartzera deitu ditu herritarrak Berbotsek. Egun osoan zehar, jolas ezberdinak izango dira itsasadarraren inguruan eta 20:00etan dantza txokoa txosnetan. Ostiralerako ere hainbat ekitaldi aukeratu ditu euskara elkarteak, San Agustin jaien egitarautik, euskaltzaleen gozamenerako. Hartara, 10:00etan La Plaza tabernan jarri dute hitzordua, beranduago udaletxeko plazan izango den bazkaria prestatzen lagundu nahi dutenentzat. Asteazkenena arte egongo da oturuntzan izena emateko aukera, La Plaza tabernan bertan, 10 euro ordainduta. Arratsaldean, 19:30ak aldera, erromeria izango da plazan, Erdizka Lauetan taldearen eskutik.
Bertsoak, ur gerra eta goitibeherak
Larunbatean, abuztuak 29, dantza txokoan aritzeko aukera egongo da txosnetan. Ordu bete beranduago, berriz, bertso saio futurista egingo dute udaletxeko (Irailaren 23a) plazan. Unai Iturriaga, Arrate Illaro, Maddalen Arzallus eta Miren Amuriza igoko dira agertokira. Gauean, txosnetan, Amaiur taldeak eskainiko du dantzaldia. Azkenik, igandean, ur gerra galanta izango da kiroldegi inguruko plazan (Europa plaza), 12:00ak aldera. Arratsaldeko bostetatik aurrera, berriz, goitibehera andana jaitsiko da Ategorritik.
Asteazken honetan hasi eta abuztuaren 30era (igandea) arte luzatuko dira San Agustin jaiak Altzagan. "Gure herria gero eta euskaldunago egiteko, aurten ere, euskaltzaleen parte-hartzea ezinbestekoa" izango delakoan, plan ederra proposatu die erandioztar zein kanpotarrei Berbots Erandion Euskaraz! elkarteak. Bihar bertan bazkaria egingo dute La Plaza tabernako arkupean, beti lez. Hantxe bertan geratu dira goizeko 11etan den dena prestatzeko. Bazkal ostean musikariak ere izango dira. Euskara elkartekoek gogoratu dutenez, 13:00etan botako dute jaien hasierako txupinazoa, ondoko plazan. Arratsaldean, berriz, La Plaza tabernan 20:00etan hasita, tabernaz taberna ibiliko da herri osoan zehar Kantagunea. Eta 21:30etik aurrera parrillada ederra egongo da txosnetan (aurten Altzagako kiroldegi atzean egongo dira). Argazkian, bihar kalerik kale ibiliko da Kantagunea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun