Loiuko aireportua handitzeko proiektuaren berri emateko eskatu dio AENAri Leioako Udalak
Bilboko aireportuaren (Loiu, Bizkaia) handitze proiektuaren inguruan egindako ingurumen eraginaren txostenari buruzko agiriak eskatu dizkio Espainiako Aireportuak eta Aireko Nabigazioak (AENA) erakundeari Leioako Udalak. Tokiko agintarien arabera, azpiegitura berriak sortutako zaratak udalerriko zonalde batean izango du eragina: EHUko Leioa eta Erandioko campusetik gertu dagoen Lertutxe urtegi inguruan, alegia. Halaber, Bilboko Aireportuaren Ingurumenaren Jarraipenerako Batzordean parte hartzea eskatu du Leioako Udalak. Aipatu bileretan Espainiako Ingurumen Ministerioak; AENAk; Eusko Jaurlaritzak; Bizkaiko Foru Aldundiak; Espainiako Gobernuaren EAEko Ordezkaritzak; Derio, Erandio, Loiu, Sondika eta Zamudioko udalek eta Lur Maitea talde ekologistak parte hartzen dute. Hala ere, Lur Maiteak dio Lezamak, Larrabetzuk eta Leioak ere aireportuaren eta hegazkinen zarata jasaten dutela. Argazkian, Lertutxe urtegiaren alboan dago Bizitzaren Basoa, zientziari euren gorputza eman ziotenen omenezko monumentua.
Leioako Udalak zehaztu duenez, ingurumen eraginaren eta AENAk uztailaren 14an aurkeztutako Zarata Isolatze Planaren (horren barruan dago Erandio) inguruko agiriak eskatu dizkiote Espainiako Sustapen Ministerioari zerbitzu juridiko leioaztarrek. Azken txosten horren arabera, 1.983 etxebizitza, eskola bat eta osasun zentro bat isolatuko dituzte. Iazko udan, aireportua handitzeko lanen berri ematean, 700 etxebizitza inguru isolatzea aurreikusi zuen AENAk. Hala ere, Lur Maitea talde ekologistaren arabera oraingo kopurua ere "ez da nahikoa". Loiuko aireportua handituz, 2014rako bidaiari kopurua bikoiztu nahi dute, 8 milioitara helduz. Horretarako, hegal berria eraikiko dute terminalean eta beste hainbat zerbitzu areagotu, 114 milioi euro erabiliz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun