Uretan jazotzen diren gertakariak bi mota nagusitan sailkatzen dira; alde batetik, itsas zabalean, kanpoko uretan, gertatzen direnak. Kasu hauetan EAEko baliabideek Itsasoko Laguntzak jarritako baliabideak laguntzeko esku-hartzen dute. Bestalde, kostaldean, hamabi milien barruan edo barneko uretan, eta ibai eta urtegietan jazotzen diren gertakariak daude; alegia, kasu gehienak. Gertakari hauetan esku-hartzeko, Eusko Jaurlaritzaren berezko baliabideak (bereziki Herrizaingo Sailarenak) edo hitzartutakoak (Gurutze Gorriarenak kasu) erabiltzen dituzte.
Euskadiko uretan aurten jazotako istripu eta erreskate kopuruaren joera aurreko urteetan izandakoaren antzekoa da, orain arte. Uztailaren 31ra arte, 161 erreskate egin dituzte; horietako gehienak (96) Bizkaiko kostaldean, beste 62 Gipuzkoako kostaldean eta gainerako hirurak Arabako urtegietan. Erreskate horiek guztiak, hiru salbu, kostaldeko edo barneko uretan egin izan dituzte.
SOS Deiakek koordinatutako baliabideak
Herrizaingo Sailak jarritako baliabideen artean honakoak daude: Ertzaintzako Itsas Unitatea, 21 metroko luzera duen "Itsas-Zain" ontzia duena, Brigada Mugikorreko Urpekarien Unitatea, bi ontzi pneumatiko eta 28 urpekari dituena, eta Helikopteroen Unitatea. Gurutze Gorria baliabideak jartzen dituen beste erakunde bat da. Itsasoko laguntzaren arloan, Gurutze Gorriak lankidetza hitzarmenak ditu bai Espainiako Gobernuarekin, bai Eusko Jaurlaritzarekin, Larrialdiei Aurregiteko (Herrizaingo Saila) eta Portu eta Itsas Gaietako (Garraio Saila) zuzendaritzen bidez.
SOS Deiakek koordinatutako larrialdietarako baliabideen lana "ezinbestekotzat" jotzen du Eusko Jaurlaritzaren Herrizaingo Sailak, Euskal Autonomi Erkidegoko uretan erreskateak egiteko, bai kostaldean, bai barneko urtegi eta ibaien ibilguetan. Urtero mota honetako 250 erreskate egiten dituzte batez beste gure lurraldeko uretan. Erreskate horietan, Ertzaintzaren, Gurutze Gorriaren eta EAEko zein Espainiako administrazioen menpekoak diren beste erakunde batzuen baliabideek hartzen dute parte. Garrantzi handiagoko esku-hartzeei dagokienez, 224 erreskate egin dituzte Bizkaian eta 176 Gipuzkoan uda honetan. Araban, berriz, nekea, ur-lasterrak edota beste egoera batzuengatik sorosleen laguntza behar izan dutenen kopurua oso txikia izan da. Bizkaian, 37 lagun eraman behar izan dituzte ospitaletara eta 125 Gipuzkoan. Zoritxarrez, bi pertsona hil dira itota; bat Sopelan, eta beste bat, Uribarriko (Araba) urtegian. Barinatxeko hondartzan abuztuaren 4an iluntzean desagertu zen 22 urteko gaztea itota topatu zuten egun bat geroago. Biktima Basauriko bizilaguna zen eta jaiotzez Kamerungoa. Argazkian, gaur goizean erreskate simulakroa egin dute Algortako Ereaga hondartzako uretan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun