Unibertsitateko ikasleek azterketa garaia osoan zehar probak prestatzeko leku egokia izan dezaten, irailaren 13ra bitartean, Leioa eta Erandioko campuseko hainbat gela asteburuetan ere zabalduko dituzte. EHUk jakinarazi duenez, zabalduko diren zentroak Gizarte eta Komunikazio Zientzien Fakultateko ikastegia eta liburutegi nagusia izango dira. Zentro horiek ordutegi honen arabera zabalduko dira: goizeko 9etatik 13:00etara liburutegia erabili ahal izango da eta ordu horretatik aurrera, 19:30ak arte, fakultatea. Bilbon ere, Sarrikoko Ekonomia eta Enpresa Zientzien Fakultateko eraikin nagusiko beheko solairuko gelak eta Ingeniaritza Goi Eskola Teknikoko (Luis Briñas-eko sarrera) ikasgelak irekiko dira. Argazkian, hainbat unibertsitario ikasten, azterketa garaian.
Bizkaian ez ezik, gainontzeko campusetan ere ikasteko gelak zabalduko ditu Euskal Herriko Unibertsitateak. Gipuzkoan, Donostiako Ignacio Maria Barriola eraikineko ikasgelak (Elhuyar enparantza, 1) zabalduko dira astebururo, irailaren 13ra bitartean. Ordutegia 8:00etatik 22:00etara izango da. Araban dagokionez, ikasteko gelak Gasteizko Irakasleen Unibertsitate-Eskolan zabalik daude jada, egunero, irailaren 11ra arte, ordutegi hauen arabera: astelehenetik ostiralera, 21:00etatik 24:00ak arte; larunbat eta igandeetan, 9:00etatik 24:00ak arte, etenik gabe. Era berean, ikasleen premiak hala eskaturik, gelak ere irekiko dira Elurretan, 8:00etatik 21:00etara. Gipuzkoako campusean zein Bizkaikoan ikasteko gela guztietan EHUko ikaslearen txartela eskatuko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun