"Euskal musika: 25 urte" saioan zenbait talde eta musikari euskaldun bilduko dira: bai artista ezagunak, bai duela gutxi hasitako taldeak ere. Saio horretan jaialdian aurretik parte hartu duten artistak zein Folk Getxo BBKra lehenengo aldiz etortzen diren musikariak ariko dira. Horrela, agertokian honako hauek ariko dira bata bestearen atzetik: Oskorri talde ospetsua, Mikel Urdangarin kantautorea eta Maddie Oihenart abeslari zuberotarra, besteak beste, Niko Etxart ahaztu gabe. Halaber, Gose eta Oreka TX talde gazteak ere ariko dira. Azken horiek trikitixa eta txalaparta erritmoak eta egungo doinuak uztartzen dituzte. Saioan partaideetako bakoitzak bere errepertorioko lau abesti joko ditu, eta, gero, hurrengo taldea sartuko da. Horrela, estilo oso ezberdinetako artista eta talde segida bat osatuko da, gure musikaren aberastasunaren erakusgarri.
Ruaille-Buaille
Bestalde, Ruaille-Buaille folk musika jotzen duen boskote bat da. Abesti propioak eta beste batzuenak jotzen ditu, hainbat jatorri geografikoen fusioan oinarritzen direnak: Irlanda, Eskozia, Ingalaterra, Galizia, Euskal Herria eta AEB. Taldearen izena hitz gaeliko bat da eta "rula-bula" ahoskatzen da. Esanahia zalaparta edo algara izan liteke, eta ederki deskribatzen du musikari horiek kontzertuetan sortzen duten giro alaia; hori bai, kanta edo balada lasai eta nostalgikoak alde batera utzi gabe.
"Euskal musika: 25 urte" saioak emango dio amaiera bihar Getxo Folk jaialdiari
2009ko ira. 5a, 12:53
Getxoko Nazioarteko Folk Jaialdiak amaiera ezin hobea izango du bihar, igandea, "Euskal musika: 25 urte" saioari esker. 20:00etatik aurrera jaialdiaren 25. urteurrena ospatuko dute musika-jai horren bitartez. Estilo anitzeko zenbait euskal talde eta artista bilduko dira Areetako Xake plazako agertokian: Oskorri, Oreka TX, Mikel Urdangarin, Maddi Oihenart, Niko Etxart eta Gose. Aurretik, 18:00etan, Ruaille-Buaille euskal-irlandar taldea ariko da Itzubaltzeta / Romoko Santa Eugenia plazan. Halaber, Ipar-Irlandako Upper Crossgare Pipe Band eta Italiako Sbandieratori e Musici Citta de Floridia bandek kalejirak egingo dituzte kaleetan. Ohi denez, kontzertuez gain, Folk Getxo BBK jaialdian jendeak Bidezko Merkatua bisitatu dezake. Ekimen horrek Iparraren eta Hegoaren arteko bidezko merkataritza sustatzen du eta zenbait GKErekin batera antolatzen da. Bestalde, hainbat herrialdetako artisautzako produktuak eros daitezke Munduko Azokan, Koan elkartearen lanari esker. Halaber, aurten ere beste kultura eta herrialde batzuetako gastronomia ere dastatzeko aukera dago Munduko Terrazan, Munduko Medikuak erakundearen eskutik. Argazkian, Oskorri, Oreka TX, Gose, Niko Etxart, Mikel Urdangarin eta Maddi Oihenart.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun